BJP Mizoram hruaitu ten Sairang leh Kolasib inkawng kawngpui dinhmun an enfiah

BJP Mizoram hruaitute chuan Inrinni khan Mizoram mamawh chawkluhna kawngpui, Sairang leh Kolasib inkar chu tlawhin harsatna awm leh hmalak mek dan te an enfiah.

BJP in thuchhuah siama an tarlan danin Buichali Lei atanga New Khamrang thleng chu Mizoram PWD ten an siam hleihtheih loh avangin tunah hian BR Goyel Company te chuan kawng siam hna hi thawkin, kumin 2025 March thla chhunga siam zawh hman an inbeisei a, NHIDCL hnuaia kawng siam dang pawh Thal chhunga siam that theih an inrin thu NHIDCL hruaitu te chuan BJP State hruaitu te chu an lo hrilh a. Hetihlai hian Mizoram PWD ten kawng an siam ve tur bik pawh siam tan mek niin, kawng siam tur enin State Sawrkar in sum hman tur an ruahman chu a beitham avangin kan chaklakna kawngpui hi hetiang chauha thawmthat anih chuan reilote ah a chhiat leh mai a hlauhawm hle niin an sawi a. Mizoram Sawrkar chu mipui ten harsatna lian zawk an tawh loh nan kawngpui hi rang taka siam tha a Furpui thlen hma ngei a siamtha turin an ngen bawk a ni.

Helai kawng an enfiahna ah hian BJP President Vanlalhmuaka chuan National Highway Four Lane, Vairengte to Sairang Road hi kum 2020-ah Central sawrkar in kawng siam hi phalsakin, kum hnih chhung a zo thei turin a lo approve tawh tih a sawi a. Nimahsela Mizoram Sawrkar leh NHIDCL te inkarah Forest Clearance chungchang ah leh Compensation chungchangah harsatna a awm avangin hna tan theih a ni ta lo tih sawiin, Mizoram chakkhai lakna pawimawh ber chu a chhe ta hle tih a sawi. Mizoram Sawrkar chu he Four Lane siam anih theihna tur hian chak taa hma la tura an duh thu sawiin, BJP Mizoram pawhin a theih na apiangah puih an inhuam bawk tih a sawi a ni.

He hunah hian BJP Mizoram State Core Group Member leh State Media Convener Dr. K. Beichhua MLA chuan inkalpawhna kawng pangngai piahlamah kan ei leh bar lakluhna bul ber kawngpui tha lo leh Thal lai pawh a Truck lian khalhtute nawrh ngai khawpa ngaihsak loh a ni chu State Sawrkar mawhphurhna a ni tih a sawi a, tuna kawngpui thawmthat dan en hi chuan Furpui thlen hma a kawng an hnawhna hi a chhiat leh hman mai a hlauhawm tih sawiin, “Mizoram Sawrkar hi hetiang lo deuh a kawngpui hi thawmthat hna thawk turin ka ngen,” a ti a. He kawngpui chhe lai bik siamna tur atana sum an dah cheng vbc. 1.25 hian rintlaka kawngpui hi a siam theih dawn loh tih sawiin, Mizoram Sawrkar chu ngaihtuahna seng nawn leh tur leh kawng daih rei zawk, kum 15 daih em em ni lo mahsela, Fur harsat zual lai thleng tala tha tur a kawng siamna tur sum MPWD te ruahman sak turin a ngen bawk a ni.