Lengpui Airport chungchang ah inkawmhona nei

Adviser to Chief Minister, TBC. Lalvenchhunga chuan Indian Air Force (IAF) kuta Lengpui Airport hlan a nih chuan Full load a thlawhna tum tir theih tura thuamthat a ni dawn a, hei hi mipuiten an chhawr tangkai zawk dawn tih a sawi.

Lengpui Airport chungchanga NGO Coordination Committee hruaitute leh sawrkar aiawhte nimin-a Aizawl-a an inkawmna ah Lengpui Airport chungchangah tlawmngai pawl hrang hrang aiawhte chu an ngaihdante zau taka sawina hun pek an ni a, He hunah hian Adviser to Chief Minister TBC. Lalvenchhunga chuan January ni 24-a Lengpui Airport Forum ten Indian Air Force kuta Lengpui Airport hlan a niha thil thleng thei an tarlan te chhangin, Indian Air Force ten Lengpui Airport an enkawl a nih pawhin an awmna tur hmung hrang dinin, tuna hmunhma awmsa chu an hmang chhunzawm dawn lo tih a sawi a, ral relna hmun atana hman tur nia sawi pawh a hmun pawimawh dan azirin thliar hran vek a ni tih a sawi a. Thlawh thlawk lut leh chhuak siam chungchang pawh DGCA chuan IAF bakah Airport leh Airlines Operator te nen an siamho vek thin tih sawiin, Indona a awm a nih ngawt loh chuan engkimah IAF te duhsak an ni ngai lo a, hemi avanga thlawhna tum tur tih khawtlai a ni ngai lo tih a sawi bawk a, thuneihna tam zawk IAF kuta lut tur anga sawi pawh, Mizoram sawrkar kutah thuneihna tam tak a la awm tur thu a sawi bawk a ni.

He hunah hian Adviser to Chief Minister TBC. Lalvenchhunga chuan, thlawhna tlan kawng (Airport Runway) chhah tha tawk lo avanga tun dinhmuna thlawhna te Full load a a tum theih loh pawh Airport hi IAF kuta hlan anih chuan tih hmasawn a ni dawn tih a sawi a, zan lama Thlawhtheihna tum tir theih turin thuam a ni dawn bawk tih sawiin, hei hi mipui tan a chhenfakawm tur thu a sawi bawk a ni.