MCC khap loh hna kalpui reng tur tih sawi

Mizoram State Election Commission chuan Local Council leh Village Council inthlanpui neih hun puan tawh hnu, Model Code of Conduct (MCC) hman a nih tawh hnuah pawh sawrkar hna enkawltuten hna kal lai, MCC-in a khap loh chu khaihlak awm lovin kalpui reng tum zawk turin a chah.

State Election Commissioner Dr. H. Lalthangliana chuan, LC/VC inthlan puan a nih rual khan Political Party leh Candidate nih tum ten an zawm tur Model Code of Conduct (MCC) hi duangin a bu-a siam a ni tih a sawi a. MCC hi sawrkar hnathawh kal lai tih thuanawp leh tih bahlahna atana siam ni lovin, sawrkar hna leh hmasawnna kal reng chung si a Political Party tin, sawrkar lai leh Opposition lam pawh tanhmun inang (Level Playing Field) neia inthlan an hmachhawn theihna atan party tana tanhmun remchang bik an insiam lohna atante a siam a ni tih a sawi a ni.

MCC kenkawh a nih lai pawhin sawrkar hna enkawltu (government machinery/officials) ten hna kal lai, MCC-in a khap loh chu khaihlak awm lo a kalpui rem tum zawk turin a chah a. MCC puan mek hian Mizoram chhunga SEC-in inthlan a puanna District leh khua a huam dawn tih a sawi a ni. SEC-in MCC bu a siama tarlan danin, MCC bawhchhiatna chungchang thu thlen duh chuan District Election Officer/District Magistrate emaw Bialtu Sector Officer/Sector Magistrate emaw hnena thlen tur a ni tih a sawi a. Anni tana rel fel remchang lo leh thuneitu sang zawka thlen ngai thil a nih chuan SEC-in an aiawh atana a ruat Election Observer-te hnenah an thlen anga, an ni hian a tul an tih danin an enfel emaw, SEC-ah emaw an thlen thei tih sawi a ni.