Mizoram-ah phar natna vei mi 10 chhinchhiah mek an ni

Khawvel puma Pharte ni ‘World Leprosy Day’ chu nimin khan hman niin tun dinhmunah Mizoram-ah Phar natna vei mi 10 an awm a ni.

Taxation Auditorium, Aizawl-a World Leprosy Day hman ah hian thupui atan ‘Unite, Act. Eliminate’ tih chu hman niin he hun hi National Health Mission-a Mission Director, Dr. Eric Zomawia chuan a hmanpui a, Phar natna chu India ram pumah kum 2027-ah um bo vek tuma hmalak mek a nih thu leh tunhma chuan India ramah leh Mizoram ngei ah pawh Phar te chuan endawng an hlawh nasat zia a tarlang a. Department Record danin Phar natna vei mi 1500 chuang an awm tawh thu sawiin, tunhma phei chuan mi engemawzat in an lo thihpui thu a sawi bawk a. Tunlaiah erawh chuan Phar natna enkawlna damdawi MDT chu man to tak ni mahse a thlawn liau liaua sawrkar in a pek thu a sawi a ni.

He huna tarlan a nih danin tun dinhmunah Phar natna vei hi Mizoram-ah mi 10 awmin Aizawl District-ah 4, Lunglei District-ah 2, Lawngtlai District-ah 3 leh Kolasib District-ah 1 te an ni a, Phar natna chu tihbaiawm a nih loh thu leh he natna nei a inrinhlelhna neite chuan Damdawi In hrang hranga Skin Specialist te emaw, Civil Hospital Aizawl, Department of Dermatology-ah inentir thin tura ngen an ni a. Phar natna chungchanga hriat tur pawimawh hrang hrangte he hunah hian sawilan a ni bawk.