Serchhip DC hoin NH-54 chungchang sawiho

Nimin khan Serchhip-ah District Bawrhsap Paul L. Khuma hovin National Highway-54 zauh leh cheithat hna thawktu Contractor te leh Official ten an hnathawh thlirletna leh hmachhawp te sawihona hun an hmang.
    Serchhip DC Meeting Hall-a thutkhawm ah hian Serchhip District chhunga National Highway-54 zauh leh cheithat hna Package I, II leh III-a thawktu Contractor zawng zawng te Serchhip Bawrhsap chuan kokhawmin NH-54 cheithat meka an hmalak tawh dante thlirletna hun an hmang a. Hemi hmalama thutkhawm an lo neih thin a an thurel an bawhzui dan te sawiho a ni a. Hnathawh duhthusam lo lai te sawilan niin heng te hi a rang lama siamtha turin DC chuan Contractor a hriattir a. Hna la thawh zawh loh te leh kawng khuar leh tlabal, siam that ngai te thlirhoin thawh zawh hun tur mumal taka bituk an ni a. Heng hun bi an siam sakah te hian thawk zo hman ngei tura beisei an nih thu Bawrhsap hian thawktute a hrilh a ni.