Serchhip-ah District Bawrhsap hovin India Republic Day vawi 76-na hman a ni

India Republic Day vawi 76-na chu nimin khan ramchhung hmun hrang hrangah urhsun taka hman a ni a, Serchhip-ah pawh Republic Day hi District Bawrhsap Paul L. Khuma hovin Serchhip Sports Complex-ah hman niin Bawrhsap hian Hnam Puanzar pawtparhin Parade Contingent te chibai buk chu a chhanglet a ni.

Hnam Puanzar a pawhparh hnua thu a sawi ah Bawrhsap Paul L. Khuma chuan Serchhip District mipuite chibai bukin India Danpui-a inziak thumal tin te chu kan ram innghahna lungphum a ni tih hre renga zawm leh tih famkim tum turin khua leh tui te chu a chah a. Serchhip District-a sawrkar Department hrang hrangte hmalakna tarlangin, Serchhip District chu India ram pumah za zela teha ziak leh chhiar thiam tamna ber District a nih thu te, Government Online Excellence Award - Best Online Initiative ah lawmman pakhatna an dawn thu leh District te inelna Tour Itinerary Creation Competition-ah pakhatna a nih thu te sawiin, District hmasawn chak ber te zinga mi leh kawng tam taka hmahruai mektu a ni tih a sawi a. Sawrkar pawhin Serchhip District mipuite chungah nasa takin rinna a nghah thu sawiin, District mipuite pawhin an tihtur leh mawhphurhnate tha taka hlen zel turin a fuih a ni.

Bawrhsap chuan sawrkar hmalakna hrang hrang tarlangin, Bana Kaih - Handholding Scheme chungchangah District Agriculture Marketing Committee, Serchhip District din fel a ni tawh thu te, sawrkar chuan thlai pali-ah Support Price a pek dawn thu leh khaw tinah Society 39 kaltlangin Primary Collection Centre din a nih thu te, Secondary Collection Centre hmun 7-a siam a nih thu te DC chuan a sawi a. Digital Agriculture Mission hnuaiah Serchhip District chu Drone hmanga Agricultural Land Aerial Survey neih hmasak berna leh enchhina pilot project neihna tura thlan chhuah niin, tunah hian kalpui mek a ni tih a sawi a. Serchhip-ah District Hospital sak tan mek niin Mizorama a hmasa ber ni turin 3D Dental Laboratory dah a nih thu te a sawi bawk a ni.

Sawrkar chuan dan leh thupek kenkawh a ngai pawimawh hle tih pawh Bawrhsap chuan sawiin, Serchhip District-ah kum kalta chhung khan pawikhawihna thleng a tlem thu a sawi a, “Kan Police te pawhin tlawmngai pawl leh mipuite tawiawmna avangin remna boruak an vawng him thei,” a ti a, Pawngsual case, tualthah case leh ND&PS case te Serchhip District Court-ah ngaihtuah a nih theih nan ruahmanna siam a nih thu sawiin, Addl. District & Sessions Judge-II, Aizawl chuan thla tin kar khat chhung zel Circuit Court a hawng thin dawn tih a sawi bawk.

Kawlphetha lamah 10MWp Grid connected SPV Power Plant chu Thenzawl-ah bun mek a nih thu leh 132 kV Sub-Station sak mek chu za zelah 95 zo tawhin Saubhagya Scheme hnuaiah New Serchhip-a 100kVA chu 250kVA DT-ah tihlen a nih thu a sawi a. Land Records Digitization kalpui mekah Serchhip District Revenue Department chuan 100% ti hlawhtling tawhin GIS Map-a mipui ram thun runpui ngawrh takin an kalpui tih a sawi a. Sawrkar kum kal mekah chhiah cheng nuai 47.58 khawn khawm tawhin rambuai 22 chingfelin, ram pass 281 an pe chhuak tawh tih a sawi bawk.

AH&Vety chuan National Livestock kum 2022-2023 chhunga ASF hri leng avanga an vawk vulhlai suattu mi 59 te hnenah compensation 25% an pek thu Bawrhsap chuan sawiin, PHE Department in JJM hnuaiah project 9 - Lungkawlh, Hmunzawl, Piler, Lung-pho, Hmawngkawn, Hriangtlang, Vanchengte leh Sialhau-ah te thawh zawh a ni tih a sawi a, UD&PA hnuaiah Insak tanpuina dawngtu chhungkaw 1525 te chuan an pawisa dawn atangin chenna In an nei tawh tih a sawi bawk.