PM Cares-a tanpuina dawngtu naupangte kawm

PM Cares kaltlanga Serchhip District-a tanpuina dawngtu naupangte kawmna hun nimin khan Serchhip-ah Bawrhsap Paul L. Khuma hovin neih a ni.
COVID-19 hripui leng rapthlak tak avanga nu leh pa in an boralsan tak naupang te tan Prime Minister Narendra Modi chuan ‘PM Cares for Children Scheme’ hi a siam a. He Scheme hi May ni 29, 2021 khan kalpui tan niin naupangte tan hamthatna tam tak siam sak an ni a, an lo puiltin hnuah an lo intundin theihna tur atan sum ruahman sak an ni. Serchhip District-ah hian PM Cares dawngtu naupang 4 an awm a. Heng naupangte hriselna chungchang te, zirna kawnga hma an sawn chhoh dan te, an dinhmun leh khawsak dan te uluk taka vil turin Bawrhsap kaihhruaina hnuaiah DCPU chuan mawh an la a. Nimin-a he hun hman ah hian heng PM Cares dawngtu mi palite hi Bawrhsap Paul L. Khuma hovin an kawm a. Bawrhsap chuan naupang te hi fuihin harsatna an nei a nih chuan amah leh District Child Protection Unit te an tan an awm reng thu a hrilh a. Zirna ngai pawimawh tura fuihin, an zir chhunzawm zelna turah harsatna an tawk a nih chuan tanpui turin an inhawng reng tih a sawi bawk a ni.

March 11, 2020 atanga March ni 3, 2022 chhunga COVID-19 avanga nu leh pa boral ve ve te; nu emaw pa emaw Covid-19 vang kher lo a boral tawh, a damlai zawka te Covid-19 avanga an boralin emaw, anmahni enkawltu (legal guardian) emaw, fa atana latu (adoptive parents) te Covid-19 avanga an boralin, an boralsan tak naupangte dawmkanna turin PM Cares hi duan a ni.

Serchhip District atanga PM Cares atanga tanpuina dawngtute hi Keitum khua atangin mi pahnih leh Chhingchhip Mualpui leh Khumtung khua atangin mi pakhat ve ve te an ni a, kum 18 an tlin huna cheng nuai 10-a mature turin account hawn sak an ni a, kum 18 an tlin atangin a pung la theiin kum 23 an tlin hunah a vaiin an lachhuak thei dawn a ni.