ZPM an ning tan mek niin MNF V/P in a sawi

MNF Vice President Lalchhandama Ralte chuan ZPM chu a thlang tlingtu mipuiin an nin tan mêk thu a sawi.

Tuivawl Bial fang-a zin mek MNF Vice President Lalchhandama Ralte chuan VC inthlan lo awm tûrah MNF chuan hnehna sâng tak chan tumin hma an lâk mêk thu sawiin, State-a rorêlna changtu ZPM chu a thlang tlingtu mipuiin an nin tan mêk thu a sawi a. “He sawrkar kan hrawn mêk hian leiman, chhiah hrang hrang an tipung a, harsatna hrang hrang kan tâwk mêk a, a theihna apiangah mipui min sawrfu mêk a ni,” tiin “MNF sawrkar khân kan ram hmasâwnna kawng tam takah a thlen a, ZPM chuan zirtirtu indaih lohna pawh dah belh aiin, a awmchhunte pawh min sawn chhuah sak chur chur zâwk a ni, a ti bawk.

Tuivawl Bialtu MLA Lalchhandama Ralte hian a bial chhunga Mauchar, Palsang leh Zohmun te a tlawh hnuah nimin khan Zokhawthiang, N. Tinghmun, Upper Sakawrdai leh Sakawrdai te a tlawh leh bawk a. “Sawrkarin kawng siamna tûr tiin road tax a ti sâng a, oil man an tisâng bawk a, an cess lâk chu kawng siam nan kan hmang dâwn ti reng chung siin kan supply line kawng a la chhe êm êm reng a ni. Chu mai ni lovin, buhfai man a lêt thawkin an han tisâng a, kan hnianghnar phah lêm lo. MNF sawrkar hun lai buhfai man Rs. 15/- a nih lai khân buhfai kudam te a khat tlângpui a, Vawiin-ah chuan ration la tûr khaw hrangten an nghâk rei thin hle a, tun dinhmunah khuarel chhiatna rawn thleng palh thut ta se, tâm hmachhawn thei reng dinhmunah kan ding mêk a ni,” a ti bawk.