Serchhip-ah BBBP kum 10 tlin leh National Girl Child Day lawmna kharna hun hman a ni

Tun thla ni 21 atanga Beti Bachao Beti Padhao (BBBP) kum 10 tlin lawmna leh National Girl Child Day lawmna neih chu nimin khan a kharna hun hmangin hemi denchhena intihsiakna hrang hranga lawmman semna neih a ni.

Serchhip DC Pisa Pui Hall-a Beti Bachao Beti Padhao (BBBP) kum 10 tlin lawmna leh National Girl Child Day lawmna kharna hun hi Serchhip District Bawrhsap Paul L. Khuma chuan hmanpuiin hmeichhia te chhanhim leh zirtir kawnga hma kan sawn theihna turin BBBP leh National Girl Child Day hi hman thin a nih thu a sawi a. India ram State dangah chuan inneihnaa hmeichhe thuamchhawm (dowry) hautak lutuk avangte leh hmeichhe rahbehna a la nasat em avangin hmeichhe fa tihhlum leh nu in nau a pai laia tihthlak a hluar hle thin a, heng thil rapthlak tak te avang hian Sawrkar Laipui chuan hmeichhiate chhanhim leh an dinhmun chawikan a tulzia hriain he hmalakna hi a kalpui a ni, a ti. Bawrhsap chuan Mizo khawtlang nunah ngei pawh hmeichhia aia mipa dahsan zawkna thinlungpu kan la tam thu sawiin, hmeichhiate dinhmun chawikan a tulna lai a la tam thu leh BBBP leh National Girl Child Day ah hian ngaihtuahna thar pu a, mi dangte zirtir chhawngtu nih tum turin kalkhawmte chu a chah a ni.

Beti Bachao Beti Padhao (BBBP) kum 10 tlin lawmna leh National Girl Child Day lawmna neih chhung hian hmeichhia te chawikanna atan kawng hrang hrangin inzirtirna kalpui a ni a, College zirlaite zingah Quiz Competition leh Public Speaking Competition buatsaih niin nimin a he hun hman ah hian lawmman sem a ni a, Quiz Competition-ah Lawmsangzuala, 4th Sem. BA leh Vansangpuii, 4th Sem BSc te chu pakhatna niin Lalhunmawii, 2nd Sem. BA leh Lalrohlui, 2nd Sem. BA te chu pahnihna an ni a, Lalramtiami, 2nd Sem. BA leh Lalpekhlua, 2nd Sem. BSc te chu pathumna an ni bawk.

Public Speaking Competition-ah Maria Zomuanpuii, 2nd Sem. BA chu pakhatna niin Lalnghakliani, 4th Sem. BA chu pahnihna leh Vanlalawmpuii, 4th Sem. BA chu pathumna an ni a. Heng bakah hian ‘Save the Girl Child’ tih hnuaiah Serchhip District atanga infiamna kawnga chawimawi tlak mi pahnih - Lalrempuii (Badminton), Serchhip leh Lalthantluangi (Hockey), Kanghmun South te chu lawmpuina thilpek hlan an ni bawk.