Kolasib-ah National Highway siam mek sawiho a ni

Nimin khan Kolasib-ah National Highway kawngpui siam mek chak zawka hmalak a nih theih nan thutkhawm neih a ni.

He thutkhawm Kolasib DC Pisa-a neih ah hian Bawrhsap Robert C. Lalhmangaiha chuan helai kawng siamtu NHIDCL hnuaia Balaji Construction-te chu ruahmanna awm tawh ang ngeiin Kolasib to Kawnpui kawngpui siam Black Topping chu March ni 31, 2025-a zofel hman turin a chah a. Fur khawchhia a lo thlen hma ngeia kawngpui siam hna hi zawhfel a nih loh chuan mipuite bakah a kawng siamtu Company-te tan pawn harsatna lian zawk a awm thei dawn tih a hrilh a. National Highway 306 chu Mizoram luhka pawimawh tak a nih angin Kolasib mipui mai ni lo Mizoram pum mipuite tan nitin mamawh chawkluhna kawng pawimawh tak a ni a, chumi chu hrereng chunga kawng siam hna hi chak zawka thawh a pawimawh thu sawiin, Balaji Company-te chu thawktu leh hmanrua pawh lakbelh turin a chah nghal bawk.

He thutkhawmna ah hian Kolasib to Kawnpui National Highway kawngpui siam mekah pawl thenkhatte'n lungawi lohna an thlen te chu ngaihtuah ho a ni bawk a. DC Kolasib chuan he kawngpui siam mekah hian mipuite chu a siamtute tan harsatna siamsak lo turin chah a, kawngpui tha tak siam a nih theih nan Sawrkar leh a siamtute chuan an theihtawp an chhuah a ni tih hria a, zaidawh taka awm turin a chah a. Pawl anga lungawi lohna lantirna a awm pawhin mipui leh khawtlang nunphung tibuai lo zawnga tihlan ni thei se tiin a ngen a. National Highway dangchat zawnga hmalakna emaw, mipui nunphung tibuai zawnga hmalakna awm lo se a duh thu a sawi bawk a ni.