Sum dinhmun thlir chunga hun an ruat ah VC leh LC Inthlan an beisei thu LAD Minister in a sawi

Local Administration Department (LAD) Minister C. Lalsawivunga chuan Mizoram sum dinhmun thlir chunga hun an ruat ah Village Council leh Local Council Inthlan an beisei thu a sawi.

ZPM Party in nimin-a Aizawl-a an Party Office-a Chhung Inkhawm an neih ah LAD changtu Minister C. Lalsawivunga chuan Sawrkar laipui Finance Commission atanga Grant an hmuhte a tlem tial tial avang leh inthlan hautak zet mai buatsaih a ngaih thin avangin mipuite phurrit an siam loh nan leh an sum hmuh ang angte dik zawka an kalpui theih nan Mizoram sawrkar chuan inthlan hun an puang fel tih sawiin, chutihlaia High Court-a an khing chu a vanduaithlak takzet tih a sawi a. “Kum 2024-ah Mizoramin Cyclone Remal avangin chhiatna nasa tak kan tuar a, Fur pui a lo thlenin Mizoramin kawng hrang hrangah harsatna kan tawk thin. Sawrkar kum thar lo awm turah hian a lan danin inthlan pawimawh tak tak pali hmachhawn tur a awm a, August-ah Village Council, September-ah Local Council, November – December-ah LADC, kum a lo thar anga AMC inthlan a lo awm leh dawn a ni,” a ti a. Inthlan hi a hautak em em tih sawiin, “Sawrkar sum a kalral nasat thin avang leh mipuiten an tawrh loh theih dan ber tur ngaihtuahin sawrkar chuan inthlan hun a puang hma ta a ni. Kum 2020-ah pawh Covid avangin inthlan hun pawhtlai a lo ni tawh a, danin thuneihna min pekin angin tunah pawh hian kan ram dinhmun ngun taka ngaihtuah chungin inthlan hun kan puang ta a ni,” a ti.

Inthlang ram kan nih angin India rama pawimawh ber chu inthlan a ni tih LAD Minister chuan sawiin, “Mipuiten kan mawhphurhna tha taka kan hlen a ngai. Kan hma lawkah VC leh LC Election kan hmachhawn dawn a, February 12-ah vote thlak a ni ang a, February 19-ah tualchhung sawrkar a piang fel vek tawh dawn a ni. Election hi a pawimawh em em a, vote thlak thei tawh phawt chuan khua leh tui kan nihna anga kan mawhphurhna a nih avangin thahnem ngai takin vote thlak theuh ang u,” tiin mipuite a ngen bawk a ni.

Sum renchem leh a hmanna tur dik taka hman a pawimawh thu pawh LAD Minister chuan sawiin, “Sum pawhpen leh a kalna tur ni lova kaltirte hi kan Chief Minister duh loh ber niin hma pawh a la ngam zel dawn a, a hnung zui turin keini pawhin theihtawp kan chhuah a ngai a ni. Sawrkar hmasa te hnathawh chhunzawm tlak a awm a nih chuan kan chhunzawm zel dawn a, kan chhunzawm mek bawk a, siamthat ngai leh ennawn ngai tam tak awmte a tul anga hma lain kan siamtha chho mek zel a ni,” a ti bawk.