Model Code of Conduct bawhchhia ah puh

Mizoram Pradesh Congress Committee (MPCC) chuan MNF Adviser leh Minister ni bawk Lalchhandama Ralte chu Model Code of Conduct bawhchhia ah an puh.

    Thuchhuah an siam danin MPCC Media Department chuan March 16,2023-a Zonet JB Lunglei in a puan danin MNF Adviser leh Minister ni bawk Lalchhandama Ralte in Lunglei Municipal Council Ward No. 11 MNF Campaign Office hawnna Zobawk a neihah March thla chhunga SEDP Second Instalment sem tum a nih thu leh Second Phase pawh kalpui nghal tur angin a sawi thu leh hei hi Model Code of Conduct bawhchhiatna chiang tak a nih thu an tarlang a. “Kohhran a rawngbawltu Upa atana thlantlin meuh ten politics a nih avanga sawrkar dan palzut an hrehlo thin hi Mizoram politics tihchhiat zelna a nih avangin hetiang thil a thleng hi Congress party chuan pawi a ti hle a ni,” an ti a. “Lunglei Municipal Council inthlan tur pual hian March 2, 2023 atang khan LMC huam chhungah Model Code of Conduct hi hman tan a ni tawh tih hre turin Minister Lalchhandama Ralte hi kan chah duh bawk a ni,” an ti.