Mizoram Sawrkar ruahmanna siam angin District Sports Committee inthlanna neih a ni

Mizoram sawrkar in District Sports Committee ruangam thar a siam chu Serchhip District-a Sports Association hrang hrang ten zawm ve an rel angin Serchhip District Sports Committee-a hruaitu thlan tura ruahman te thlanna chu nimin khan tluang taka neih a ni.

Mizoram District hrang hranga Sports Committee te sawrkar in an hruaitu inruat danah kalphung thar leh ruangam thar a siam avanga hun engemaw chen hruaitu thar insiam theih loh a nih hnuah Serchhip District Sports Committee hnuaia Associaton hrang hrang ten sawrkar kalphung ruahman thar zawm an remtih tak avangin Serchhip District Sports Committee hruaitu thar thlanna chu nimin khan Serchhip DC Meeting Hall-ah neih a ni a, he hunah hian Returning Officer Malsawmtluanga, DRDO Project Director chuan inthlanna buatsaih a nih dan te sawiin, he inthlanna ah hian Post thlan tur pathum a awm thu leh chuh tumte tana hming pekluh hunah Post tinah mi pakhat zel Nomination Paper thehlut an awm thu a sawi a, hemi ang hian Sr. Vice Chairman-ah K. Tlangthanmawia (Bazar Veng); Vice Chairman-ah Lalrinmawia (Chanmari Veng) leh Asst. Secretary-ah Vanlalhruaia (Medical Complex) te thlan an nih thu a sawi a. District Sports Committee kalphung tih danglam a nih avangin sawrkar in Committee a mawhphurtu tura sawrkar Official a ruat te lo kaihhruaia kan lo thawhpui thiam a tul thu sawiin, sawrkar in Dan a zam te tha taka kalpui a nih theih nan thawhhona tha tak nena kal a tul thu a sawi bawk.


He hunah hian Serchhip Addl. DC Lalmuansanga Ralte pawhin kalphung ah tih danglam a awm a nih chuan thil inthial a awm ve thin thu sawiin, chutiang kara kum 2023-2025 chhunga Serchhip District Sports Committee hruaitu tur thlanna tluang taka neih a ni chu lawmawm a tih thu a sawi a. Kan District tan hmasawnna turin ke kan pen tlan zel a tul thu a sawi bawk.

Nimin-a Serchhip District Sports Committee hruaitu thlanna ah hian SDSC hnuaia Sports Association 20 atangin Association hrang hrang 18 aiawhte an kal a, Mizoram State Sports Council (MSSC) atangin Sr. Sports Promotion Officer R. Lalrinmawia chuan Observer niin a rawn hmanpui bawk a ni.

Tarlan tawh thin angin Mizoram sawrkar chuan District tina District Sports Committee hruaitu ruangam hi a siam thar a, hemi ang hian District Bawrhsap te chu Chairman niin Sr. Vice Chairman, Vice Chairman leh Asst. Secretary te chu Recognised Sports Association atanga thlan tur a ni a, Secretary-ah District Sports & Youth Officer a nih bakah Financial Secretary tur chu Council in a ruat dawn a. Member atan Recognised Sports Association tina President bakah Ex-Officio sawrkar Department thenkhat aiawhte leh Council in a ruat te an awm thei dawn bawk a. He ruangam siam hi dodalna nasa tak a awm avangin District thenkhat ah inthlanna hi neih mai theih a ni lo a, Serchhip District-ah pawh hun engemaw chen hnuah inthlanna hi neih theih a ni ta a ni.

Comments

Popular News (Last 30 Days)

Bawngchawm tlang khualbuk rawktu nia hriat mi 2 man