Mizoram-ah COVID-19 Hripui len hma aiin hripui len hnuah innei thar inziaklut an tam zawk

COVID-19 len lai, mipui khuahkhirhna khauh taka kalpui a nih khan Mizoram-ah innei thar an tlem phah lova, hri len hma kum 2019-2020 aiin hri len hnu kum 2020-2021-ah innei thar an tam zawk.

Registrar General of Marriages-in an chhinchhiah danin April, 2019 atanga March, 2020 chhung khan Mizorma-ah innei thar, sawrkara inziaklut 2,694 an awm a, Hri leng avanga lockdown kalpui a nih hnu, April, 2020 atanga March, 2021 chhungin innei thar 3,703 an awm a, hri len hnua innei thar tam zawkna chu 1,009 a ni. Khawvel in hri leng a hmelhriat kum hnihna, 2021-22-ah erawh innei thar hi a kum hmasa aiin an tlem deuh thung a. Sawrkara inziaklut 1,204 an awm a. Hemi kum hian Mizoram-ah April atanga kum tawp thlengin lockdown kalpui fo a ni.

Nupa tuak tharte sawrkara an inziahluhna tur Dan, The Mizoram Compulsary Registration Marriages Act, 2007 hi kum 2008 khan hman tan a ni a, he Dan hnuaiah hian innei thar apiangte chu sawrkarah an inziaklut tur a ni a. Registrar General of Marriages hotute sawi danin, he Dan hman tan a nih atanga March, 2022 thleng khan innei thar sawrkara inziaklut mi 35,196 an awm tawh a, an zinga mi 32,611-te chu Kristian dan-a innei an ni a, Hindu dan-a innei 157, Muslim dan-a innei pakhat, Buddhist dan-a innei 2,424 leh Sakhaw dang dana innei pathum an awm bawk a. Sawrkar kum kalmek Report hi thla thar ah thehluh feltur niin hemi hnu hian innei inziaklut zat pawh hi an pung leh dawn a ni.

The Mizoram Compulsary Registration Marriages Act hnuaiah hian nupa tuak thar ten an inneih atanga thla khat ralhmain sawrkar ah an inziaklut tur a ni a, huntiam a ral hnuah chuan Late Fee chawi zel a ngai a ni. Registrar General of Marriages hotute chuan thingtlang hmun thenkhata chuan a pawimawhzia hre lem loa ngai pawimawh lo deuh an awm nia sawiin, a nawlpui erawh chuan an ngai pawimawh chho ta viau tih an sawi a, sawrkara inziaklut lo, a hnua Certificate mamawh leh si, Late Fee thahnem tak chawia inziaklut tha lehte pawh an awm tih sawiin, kum tlinglo innei te chu registration hi tih theih a ni lo niin thulakna chuan a tarlang bawk a ni.