Latest News

Vantawng Group YMA in Thenzawl District a pian theih nan chak taka hmalak an rel

Vantawng Group YMA chuan Thenzawl District a pian theih nan chak taka hmalak nise an ti.
Serchhip Sub-Hqrs. YMA huamchhunga awm Vantawng Group YMA hian nimin atang khan Thenzawl PTS Branch-ah Group YMA Conference vawi 25-na hmangin nimin khan chawhma lamah an President Chawngsangliana kaihhruaiin rorelna hun an hmang a, an thurel zingah Thenzawl District a pian theih nan Vantawng Group YMA in chak taka hmalak ni se an tih bakah RD Block Thenzawl-a a awm theih nan hmalak ni se an ti bawk a, Thenzawl-ah Sub-Treasury Office a awm theih nan hmalak ni se an ti bawk a ni. Hei bakah hian Vantawng Group YMA hnuaia zirtirtu mahni Post nilo a thawkte mahni post ngei a thawk tura hmalak ni se tih te, Vantawng Group YMA buatsaihin Chapchar Kut hman ni rawh se tih te, Vanva luidung a lo thianghlim nan nana hmalak te, Branch hrang hrang fai inelna neih te, Ruihhlo do kawnga chak zawka hmalak te leh Environment humhalh kawnga hmalak te pawh an thurel zingah a tel a ni.


Nimin-a Vantawng Group YMA Rorel Inkhawm ah hian kum kalta chhunga an member boral mi 82 te sunna hun hmangin chawhnu lamah Serchhip Sub-Hqrs. YMA kaihhruaina in kum 2023-2025 chhunga hruaitu tur thlanna neih a ni a. President-ah C. Lalnunthara (Branch I); Vice President-ah Chawngsangliana (Thenzawl Bazar Branch); Secretary-ah Lalhmingmawia Sailo (Thenzawl Vengthlang Branch); Asst. Secretary-ah Lalbuatsaiha (Neihloh Branch); Treasurer-ah R. Lalchhandama (Thenzawl Farm Veng Branch) leh Fin. Secretary-ah C. Lalramthara (Buangpui Branch) te thlantlin an ni a. He hunah hian Conference Silver Jubilee Mei det nghal a ni bawk.

Vantawng Group YMA Conference-ah hian nizan khan Vantlang Inkhawm neiin Palai lawmna neih a ni a, he hunah hian Serchhip Sub-Hqrs. YMA President Kawlthuama leh Thenzawl DFO Lalbiakchama Chawngthu te chuan thu an sawi a. Vawiin hian Vantlang Inkhawm nei lehin chawhnu lamah Hnam Lam (Khuallam leh Sarlamkai) hmanga intihsiakna neiin zanin-ah Palai thlahna Inkhawm neih a ni anga, Central YMA hruaitute ten an hmanpui ang.

Vantawng Group YMA huamchhungah hian Thenzawl-a YMA Branch 9 bakah Neihloh, Buangpui, Kanghmun South leh Zote South Branch YMA te an tel a, YMA Member mipa 3674 leh hmeichhia 3081, an vaiin 6755 an awm mek a ni.

Comments

Popular News (Last 30 Days)