Mizoram hian sawrkar thar, Corruption laka fihlim, ‘Say No Corruption’ ti tur mi a zawng mek - R. Vanlaltluanga

Kumin-a Mizoram Legislative Assembly Inthlanpui neih tura Congress Party in Serchhip Bial-a an Candidate tur R. Vanlaltluanga chuan nimin khan Serchhip-a MJA Member te kawmin Mizoram hian sawrkar thar, Corruption laka fihlim, ‘Say No Corruption’ ti tur mi a zawng mek nia a hriat thu a sawi.

Serchhip Press Club-a thuthar thehdarhtute a kawmna ah hian R. Vanlaltluanga chuan kumin-a Mizoram Inthlanpui neih tura Congress Party chuan Serchhip Bial-a an Candidate ni tura an puan tawh thu leh puan hmasak ber pawl a nih thu sawiin, MLA nih thu a thil tum a nih thu leh Politics chu mipuite leh ram rawngbawlna a nih thu thuthar thehdarhtute zawhna chhangin a sawi a. Amah chu Thenzawl khua a piang a nih thu leh In te pawh nei a nih thu sawiin, amaherawh chu eizawnna avangin khaw dangah a awm mek thu a sawi a. Serchhip Bial chuan sawrkar hmasa Lal Thanhawla hunlaiin Development tam tak a lo hmuh tawh thu sawiin, Serchhip Bial mipuite rilru chu puitling a tih thu leh inthlanpui ah mipui ten thil ti thei-a an siam a nih chuan khawtlang-ah leh Party-ah pawh thawhpui tur tha tak tak a nei nia a hriat thu a sawi bawk.

R. Vanlaltluanga chuan pawl hrang hrangah te pawh mi pahnih khat in an atchilh avanga Pawl alo nung thin ang hian mi ten ‘A va a ve’ an tih tur khawpa ram tana inpe Zoram hian kan zawnchhuah a ngai tih a sawi a, chutiang tur atan chuan a rawn penchhuak ta tih a sawi a. Hmasawn turin mipui ten an zir a ngai tih sawiin, Serchhip Bial hian kawng tam takin vanneih bikna kan neih thu leh mipuite pawhin an zir thu a sawi a. “Serchhip-ah hian mi an taima a ni, chung hna thawk taima tak tak te han chhawmdawl hna te, tun aia an bungrua leh thlai tharchhuah te man man zawk leh hlawk zawka an tharchhuaha hmasawnna a thawhpui hi ka rilru ah a lian a ni,” a ti a. Serchhip chu mi an taima thu leh taima lo khua aia taima khua thawhpui a chak thu a sawi a ni.

Mizo mipui ten kan MLA te kan tehna tur chu thlak tha a tih thu pawh sawiin R. Vanlaltluanga chuan, Zirna (Education) atana kan khawtlang leh mipuite tana rilru min puipui dan te, kan hriselna leh nunphung ah te eng angin nge min vei tih leh hna kan thawhna kawnga hma min lakpui dan te chu tehna atan hman a tul thu a sawi a. “Chutiang anga Zoram MLA hrang hrangte kan teh hunah chuan hma kan sawn dawn a ni,” a ti a. Tum bik nei-a hmasawnna kalpui chu a ngaih pawimawh a nih thu leh MLA atana thlantlin a nih chuan kum khat chhung lekin Serchhip Bial-ah hmasawnna an hmuh ngai loh hmuh tir a thum thu a sawi bawk.

Hei bakah hian an Party chuan Serchhip-ah hma an sawn thu pawh sawiin, “Mizoram hian sawrkar thar, Corruption laka fihlim, ‘Say No Corruption’ ti tur mi thinlung a zawng mek a, hei hi Pathian pawhin a zawn mek niin ka hria a, chutiang thinlung kan pu a nih chuan Pathian hian min la chawichhuak ngei dawn a ni,” a ti bawk.