Air India-in Lengpui Airport-a an flight titawp

TATA Group hnuaia awm Air India chuan March 18, 2023 atang khan Lengpui Airport-a an flight neihte an titawp ta a, Air India thlaktu tur chu ngaihtuah mek niin, tihfel theih thuai beisei a ni tih Mizoram sawrkara Aviation Wing hotute chuan sawiin, tun dinhmunah Lengpui Airport-ah Indigo leh Alliance Air flight a la awm a ni.

    Lengpui Airport-a flight an tihtawp tur thu hi Air India aiawhte hian February 18, 2023 khan Lengpui Airport thuneitute hriattir an ni a. Aviation Wing hotute sawi danin Air India-in flight an tihtawp chhan chu TATA-in a lak tak vang a ni a. “Nikum lam atanga Winter Schedule a kal laklawh tawh avangin anni (Air India) tan Schedule hmang zo loa in-withdraw theih a ni lo a, Schedule a zawh hnuah chauh an in-withdraw thei, Winter Schedule nei sa lo ila chuan TATA-in an lak tirhah an in-withdraw nghal ang,” Aviation Wing hotute chuan an ti.

    Aviation Wing hotute sawi danin Air India tawp mah se Lengpui Airport-ah hian Alliance Air leh Indigo service a la awm dawn a. Lengpui Airport-a flight ngah ber chu Indigo niin 80% vel flight an nei a, Air India leh Alliance Air flight neih zat a intluk thuak a, Air India-in an ngah hret zawk.

    Air India thlaktu tur hi TATA subsidiary chhunga mi tho an beisei mek tih Aviation Wing hotute chuan an sawi a, TATA lamin thutlukna an rawn siam vat an ring tih an sawi bawk.

Comments

Popular News (Last 30 Days)

LPG man bithliah thar