Mizoram-ah National Paragliding Training nei dawn

Mizoram Aero-Sports Association chuan National Aero-Sports Policy Vision 2030 tihhlawhtlinna turin Paragliding Training an buatsaih dawn tih an sawi.

Mizoram Aero-Sports Association hruaitute hian nimin khan Aizawl Press Club-ah thuthar thehdarhtute kawmin Mizoram Aero Sports Association hruaitute chuan India rama a vawi khatna atana Paragliding Training mumal tak siam a ni dawn tih tih hi an sawi a. March 30 atangin Champhai-ah bul tan tur a nih thu leh April 17 thleng training hi neih tur a nih thu sawiin, India rama Paragliding Coach tha ten training hi an rawn neih pui dawn a. Champhai-ah hian Pilot Proficiency I leh II training te kalpui a ni ang a, Pilot Proficiency III hi Serchhip-ah neih tur niin tun tumah hian State 12 atangin paraglider 45 ten training hi an nei dawn a, heng zingah hian Mizoram atangin mi 10 an tel dawn a ni.

He training hi International Paragliding Syllabus zulzuia kalpui a ni dawn a, Skill India in a pawmpui niin Certificate pawh Skill India hnuai atanga pekchhuah tur a ni a. He training hi Mizoram mai ni lo, India ram pumpui huapa training mumal taka huaihawt hmasak ber tur a ni. Training a tel, Course zir chhuak te chu International Paragliding Licence pek an ni dawn a, khawvel khawi hmunah pawh thlawkin Paragliding Competition ah te pawh an tel thei tawh dawn a. Certificate hi eizawn nan pawh tangkai tur a ni a. National Aero-Sports Policy Vision 2030 policy ang chuan India mi nuai 10 chuangin Paragliding hi an hlawkpui hman tura tih a ni a, hemi atang hian India chuan Aero-sport leh a kaihnawih avangin cheng vbc. 1,600 a lalut hman tura beisei a ni.

MASA hian 2011 khan International Paragliding Festival a lo thleng tawh a, hemi tum hian India ram mi bakah Nepal leh Sweeden atangin mi 47 an rawn thlawk a, kum 2018-ah Pre-World Cup Serchhip hmuna Mizoram Aero-Sports Association Takeoff hmun ah neih leh niin ram hrang hrang 9 atangin mi 75 an in inelna an hmachhawn a. Kum 2020 khan International Paragliding Accuracy Championship, FAI Category-1 an thleng leh a. Serchhip MASA hmun ah ram 7 atangin mi 21 in an in el leh bawk a ni.

Comments

Popular News (Last 30 Days)

Vawiin-ah HSSLC Exam result

LPG man bithliah thar