Solar Technology-a siam khawl hrang hrang chhawpchhuahna hun hman a ni

Solar Technology hmanga siam khawl chi hrang hrang chhawp-chhuahna hun, Mizoram Trade Facilitation Fair 2023 chu nimin khan Aizawl-ah neih tan niin Vawiin hian chhunzawm a ni ang.

SELCO Foundation buatsaih Mizoram Trade Facilitation Fair 2023 hawnna Millennium Centre, Aizawl-a neih hi Commere and Industries Department changtu Minister Dr. R. Lalthangliana chuan hmanpuiin Mizoram mamawh Ni zung chakna khawl hman tangkaina tura rahbi pawimawh tak Mizoram Trade Facilitation Fair buatsaih a ni chu lawmawm a tih thu sawiin, Mizoram in kumtin a kawlphetha chawkluh nana a sum hman thahnem tak chu Ni zung chakna a siam khawl chi hrang hrang hmanga phuhruk anih chhoh zel a beisei thu a sawi a. Lo nei mite pawhin he Trade Fair-a an chhawpchhuah khawl, hman awlsam tak tur chu an tangkaipui ngei a rin thu a sawi bawk.

Minister chuan Ni zung chakna hmanga kawlphetha siam chu thildang nen a tehkhin in a sum ngai tur a tlem zawk mai bakah tuihna tha leh boruak thianghlim kan neih theih zelna tura kan ram thing leh mau te kan humhalhna kal mek nena inmil tak anih avangin kan ngaih pawimawh zual a ngai a ni, a ti bawk.

Mizoram Trade Facilitation Fair 2023 hi SELCO Foundation, Planning Department, North East Initiative Development Agency leh Mizoram Science, Technology and Innovation Council tangkawp in ni hnih chhung awh tura an buatsaih niin Solar Technology hmanga siam khawl chi hrang hrang chhawpchhuah a ni a. Lo nei mi te, NABARD hruaitute, Mizoram chhung a entrepreneurs te leh sawm bik te an tel a ni.