Serchhip-a AH&Vety Department hnuaiah SEDP 2nd instalment semchhuak dawn hnai

Serchhip-a AH&Vety Department chuan an Department hnuaia Family Oriented SEDP dawngtute chu 2nd Instalment pe turin hma an la mek a, karleh lamah sum hi pekchhuah hman an beisei tih an sawi.
AH&Vety Department hian nimin khan Serchhip P&E Veng-a AH& Vety Department Training Hall-ah Serchhip P&E Veng, Serchhip Kâwnpui North leh Serchhip Hmar Veng huamchhunga Family Oriented SEDP hnuaia an Department kaltlanga Trade thlangtute kokhawmin 2nd Instalment pekna tur atan an Bank Account an enfiah sak a, he hun hi Serchhip DVO Dr. R. Lalmakthanga chuan kaihruaiin SEDP hnuaia tanpuina dawngtute chu sawrkar Flagship Programme ti hlawhtlingtu ni tur leh ranvulh ti hlawhtlingtu ni tura an duhsak thu a sawi bawk.


Serchhip-a Senior Veterinary Officer Dr. John Lalhnuna pawhin SEDP tanpuina dawngtute chu an sum leh pai dawn te a hmanna tura ruahman ah dik taka hmang tura chahin, heng te hi an zawm that chuan endikna neih leh hunah pawh tanpuina sem leh theih te dawng leh tura harsatna an neih loh tur thu a sawi bawk a ni.

AH&Vety Department hian an Department Bial then hrang hrangah tunkar atang hian Family Oriented SEDP hnuaia tanpuina dawngtute hi an Bank Account enfiah sak hna an thawk mek a, heng Bial tin te hian an tihfel hman chuan karleh chhungin tanpuina an dawn tur 2nd Instalment Rs. 25,000/- chu a dawngtu turte Bank Account-ah thun hman an beisei thu an sawi a. Heng sum te hi pekchhuah fel a nih chuan Family Oriented SEDP hnuaia tanpuina dawngtute hian Rs. 50,000/- theuh an dawng tawh dawn a ni.


AH&Vety Department hi Serchhip District-a SEDP kalpuitu Department hrang hrangte zingah beneficiary ngah ber niin beneficiary 1746 zet an nei a. Heng zinga 1011 te chu Vawk vulh thlang niin Ar vulh thlang mi 581, Sial vulh thlang mi 59, Bawng vulh thlang mi 55 leh Kel vulh thlang mi 40 an awm a ni.


Hetihlai hian Family Oriented SEDP kalpuitu Department thenkhat te pawhin 2nd Instalment hi an pechhuak thei dawn hnai nia an hriat thu an sawi a, Department thenkhat chuan sum hmuh thuai an beisei thu an sawi laiin Department hotute lam atanga thu thar la nei lem lo Department te pawh an awm bawk a ni.

Comments

Popular News (Last 30 Days)

Vawiin-ah HSSLC Exam result

LPG man bithliah thar