Zokhawsang-a AR an insawnfel tur thu lo hrilh

Union Home Minister Amit Shah chuan Mizoram Lok Sabha MP C. Lalrosanga chu Aizawl atanga Zokhawsang a Assam Rifles an insawnfel vek tur thu a hrilh.

Sawrkar thuchhuah tarlan danin Mizoram Lok Sabha MP C. Lalrosanga hian nimin khan Union Home Minister Amit Shah chu a Pisa-ah hmuin Assam Rifles an insawnchhuah dawn avangin lawmthu a hrilh a. Hemi chungchangah hian amah (Amit Shah) leh Central sawrkar hruaitu dangte pawh vawi engmawzat alo nawr tawh thute sawiin, sawrkar laipui laka an thil ngiat tihhlawhtlin a nih dawn takah hian Chief Minister Zoramthanga pawh a lawm hle tih Union Home Minister chu a hrilh a. Assam Rifles hi hun bituk chhunga insawnfel vek tura an duh thu a sawi chu chhangin Amit Shah chuan, “An insawn ngei ang,” a ti a ni.

Union Home Minister chuan project engemawzat hawng tura Aizawl hi a tlawh tur thu sawiin, Assam Rifles Battalion Headquarters a hawn bakah Laldenga Cultural Centre lungphum pawh a phum tur thu a sawi bawk a ni.