Eiruk thubuai-ah Serchhip-a Excise Office leh Treasury Office-a thawk thin thiamloh chantir an ni

Serchhip-a Excise & Narcotics Department Office-a eirukna thubuai ah Special Judge (Prevention of Corruption) Dr. HTC. Lalrinchhana chuan a hunlai-a Serchhip-a Superintendent of Excise Rongura, Luangmual, Aizawl leh Treasury Office-a Asst. Account Officer Suakngura, P&E Veng Serchhip te thiamloh chantirin karleh Thawhtanni, March ni 20, 2023 khian hremna puan a ni ang.
Hemi chungchang Court in a sawi danin END Office, Serchhip-a Superintendent ni thin H. Rongura chuan August 2010 atanga January 2017 inkar khan an Staff hlawh tur, Bill 106 an siam atangin hlawh tur zat ngai renga siam siin, a Grand Total-ah hlawh atana ngai aia tam Bank atangin a naute a lakchhuah tir thin a, heng ah hian ama Personal Bank Account bakah a chhungte Account leh a hnuaia thawkte account chu sum transfer-na atan hmansakin, a sumfaiin a draw chhuah tir leh a, amah hi an pe thin a ni. A hmanna tur dik tak ni loa H. Rongura'n sum a draw tir zawng zawng hi Rs. 1,81,58,871 a ni a; hemi atanga Rs. 8,10,506 hi an Office mamawh, bungrua leh thildang leina atan bakah Bill pek ngai pekna atante hmangin, Evidence atanga a lan dan chuan, a bak Rs. 1,73,48,365 chu chheprelh a ni.

He thilah hian END Office, Serchhip-a thawktu thenkhat, sum lam kaihhnawih khawihtute pawh thu zawhfiah an ni a, mi pahnih chu an pu berin ti tura a tih anga ti mai an nih avangin Court chuan eiruknaa inhnamhnawih an nihna a hmu loa, Cashier Sainguri Chenkual chu H. Rongura hian Office mamawha hman tura pe nia a insawi avangin eiruk sum ngei a ni tih finfiahna tur a awm lo anga ngaih a ni a, sawrkar Witness-ah tan tirin Court hian thiamloh a chantir lo a ni.

H. Rongura hian Treasury Office lamah thurualpui nei nia a insawi avangin, a tira he thubuai chhuina a hming sawilan tel loh, hetih hunlaia Serchhip Treaury Office-a Assistant Account Officer Suakngura pawh chhuizui a nihnaah, Rs. 41,000 a lo dawng ve tih hriatchhuah a ni bawk a. He Case chhuitu ACB-in a chhuina kimchang Court-a an thehluh hnuah Court hian an chungthu a ngaihtuah a, thuhretu mi 43 vel a koh hnuah H. Rongura leh Suakngura te hi thiamloh a chantir a. Bail an dilna ang chi reng reng chu remti lovin nimin khan Jail-ah dah nghal an ni.