Zirtirtu pension 668 leh lak thar 152 an awm

Kum 2019 atanga January 31, 2023 inkar ah Mizoram School Education Department-a Zirtirtu a ngheta thawk pension-a chhuak mi 668 an awm a, zirtirtu a ngheta thawk tur mi 152 chiah lâk a ni thung a. Primary School leh Middle School-ah zirtirtu leh Headmaster post ruak 2,584 a awm.

School Education Department-in RTI Act hmanga zawhna an chhàn danin, January 2019 leh January 31, 2023 inkara School Zirtirtu a ngheta thawk pension-a chhuak mi 688-te hi Primary School zirtirtu 187, Middle School Zirtirtu 210, High School zirtirtu 98 leh Headmaster 74, Higher Secondary School zirtirtu pariat, Hindi zirtirtu H/S-ah 28 leh Middle School-ah mi 83 an ni.

January 2019 leh January 2023 inkar ah vêk sawrkar School-a a ngheta thawk turin Zirtirtu mi 152 lâk a ni a, chungte chu Primary School atan mi 94 leh Middle School atan mi 58 an ni a. Education department chuan, zirtirtu a ngheta lâk zingah Advertisement chhuah loa lak an awm lo niin a tarlang. School Education Department-a zirtirtu a nghet loa Muster Roll-a thawk tur mi 1,735 lâk a ni thung a; chungte chu P/S-ah mi 817, M/S-ah mi 63 leh, Hindi zirtirtu M/S leh H/S atan mi 855-te an ni.

MNF kaihhruai sawrkar Flagship Prog-ramme Socio Economic Development Prog-ramme (SEDP) hnuaia thawk turin zirtirtu mi 701 lak a ni tawh bawk a, chu'ngte chu Primary School atan mi 337, Middle School atan 122, High School atan 230 leh Higher Secondary School atan mi 12 an ni. Mizoram swrkar School-a zirtirtu a ngheta thawk tur, a nghet lo (MR)-a thawk tur leh SEDP hnuaia lâk zawng zawng chu mi 2,588 (152+1735+701) an tling bawk a ni.