Serchhip END Office-a sum chingpen-a thiamloh chang te tang tur leh pawisa chawi turin hrem

Excise & Narcotics Department Office, Serchhip-a sum tih chingpen thubuai a Court in thiamloh a chantir mi pahnih te chu lung In tang tur leh sum chawi tura hrem an ni a. Court-in a hremna hi kum 3 aia tam tan a nih avangin Bail-a chhuah theih an ni lo a. An duh chuan Court sang zawkah an khinglet thung a ni. 

Special Judge (Prevention of Corruption) chuan Serchhip Excise Office-a eirukna thubuaia thiamloh a chantir mi 2 te hremna hi nimin khan puangin Serchhip Excise & Narcotics Department-a Superintendent of Excise hlui Rongura, Luangmual, Aizawl chu thiamloh chantir a nihna thubuai pathum-ah kum 5 thleng lung In tang tur leh cheng nuai 60 theuh chawi tura hrem niin pawisa chawi tur hi a pe thei lo a nih chuan kum 30 lung In tang tura tih a ni bawk a. Kum upa tawh leh sawrkar hna atanga chawl tawh, hetiang thubuai ti nawn leh tawh lo tura ngaih a nih avangin Court chuan hremna hrang hrangte hi hmun khat-a kalkhawm turin a ti a. Hemi ang hian Rongura hi kum 5 (nga) thleng lung In tang tur leh cheng nuai 180 chawi tura tih niin pawisa chawi tur hi a pe thei lo a nih chuan kum sawmkua (90) chhung lung In tang tura tih a ni bawk.

He thubuai a thiamloh chantir Serchhip Treasury Office-a Assistant Account Officer hlui Suakngura, P&E Veng Serchhip pawh thubuai pathum ah kum li (4) thleng lung In tang tur leh cheng nuai khat chawi tura tih niin pawisa chawi tur hi a pe thei lo a nih chuan thla ruk (6) chhung lung In tang tura tih a ni bawk a. Ani pawh hi hremna hrang hrangte hi hmun khat-a kalkhawmin kum 4 (li) chhung lung In tang tur leh cheng nuai 3 chawi tura tih niin pawisa chawi tur hi a pe thei lo a nih chuan kum khat leh a chanve (Thla 18) chhung lung In tang tura tih a ni bawk.

Court chuan Pawisa eiruk zat hi felfai taka finfiah a nih avang leh a tam tham em avangin Prevention of Corruption Act, 1988 hnuaia Section 16-na in a tarlan ang tinzawn in pawisa chawitur tam lam hi pawisa eiruk mil hisap a chhut a nih thu tarlangin, Treasury Pisa-a thawkte thamna lak hi a pawi hle a, hetiang a nih chuan alang apau (Express) emaw, sawilang kher lo (Implied) pawhin pawisa pekchhuah tur tih khawtlai sak emaw hmang te in Treasury Pisa-a thawkte hian thamna an phut fo thei dawn a tih a tarlang a. Hetiang thubuaia hremna hi thuhnu dawn taka ngaihtuah ngai a nih thu a tarlang bawk a. Court-in a hremna hi kum 3 aia tam a nih avangin Bail-a chhuah theih an ni lo bawk.

Tarlan tawh angin Serchhip-a SE hlui Rongura hi kum 2011 leh kum 2017 inkarah Superintendent, Excise & Narcotics Department, Serchhip District-a thawk te hlawh tur aia tam an hlawh (Salary) Bill-ah siam in Rs. 1,73,48,365/- zet eirukna ah thiamloh chantir a ni a. Dan bawhchhiatna a a thurualpui, thamna Rs. 41,000/- lo dawngtu a puh khatihlaia Ser-chhip Treasury Office a Assistant Account Officer Suakngura pawh hi thiamloh chantir a ni bawk.