Kumin ah Champhai District-ah ruihhlo man tam

Kumin chhungin Champhai District-ah ND&PS Act, 1985 hnuaiah thubui 41 ziahluh a ni tawh.

Nimin khan Champhai-a District Bawrhsap James Lalrinchhana hovin District Level Narco Coordination Centre (NCORD) Committee chu thukhawmin kumin chhunga an District-a ruihhlo man zat leh Narcotic Drugs and Psychotropic Substances Act (ND&PS Act), 1985 hnuaia case ziahluh dan te tarlan a ni a. January ni 1, 2023 atanga niin March ni 29, 2023 thleng khan Champhai District Police-ten ND&PS Act, 1985 hnuaiah case 20 an ziaklut a, hemi kaihhnawihah hian mi 27 man niin heng zinga 6 te hi ramdang mi an ni. Heroin hawng 524 (gram 6305.96) man niin, tualchhung market-a a hlut zawng Rs 1,57,20,000/- a ni. Hemi chhung vek hian Ganja kg 6.35, tualchhung rate-a a hlut zawng Rs. 9,525/- hu Assam Rifles nena tangkawpa man niin, Alprazolam mum 450 (gram 30), tualchhung rate-a Rs. 15,000/- hu an man bawk a. Ruihhlo man zawng zawng hlut zawng hi tualchhung rate-a chhutin Rs. 1,57,44,525/- a tling a ni.

Kumin chhung vek hian Excise & Narcotics Department Champhai te'n ND&PS Act, 1985 hnuaiah thubuai 15 ziaklutin mi 21 an man bawk a; heng zinga mi 5 te hi ramdang mi an ni. Heroin gram 1199, tualchhung rate-a Rs. 5,43,800/- hu an man bawk a; heng zinga hawng 70 (840 gram) te hi Assam Rifles nena Joint Operation kaltlanga man a ni bawk.