BAO Office sawnchhuah duhloh lantir nan North Vanlaiphai-ah Total Bandh neih a ni
North Vanlaiphai VC, Political party hrang hrang leh NGO hrang hrang intelkhawm Joint Action Committee hmalakna an khua atanga Block Agriculture Officer (BAO) Office sawnchhuah duh lohna lantir na'n Total Band an huaihawt hi nimin zing dar 6:00 atang khan North Vanlaiphai khawpum-ah neih a ni a, YMA Branch hrang hrang 4- Bangla Veng Branch, Damdawi Veng Branch, Rahsi Veng Branch leh Venglai Branch te chuan an Veng chhung theuhah a remchan anga Duty Post siamin an duty a, mipui ten an thlawp thain pawn chhuak an awm meuh lo a, Dawr leh sumdawnna hmun bakah sawrkar Pisa zawng zawng khar a niin, lirthei che vel a awm lo bawk a. He Total Bandh hi mipuiin an thlawp that avangin chawhnu dar 1:00 khan tihtawp a ni.
North Vanlaiphai khawtlang hian thla hmasa February ni 21 khan an khua atanga Block Agriculture Office sawnchhuah duhloh lantir nan an khawchhung ah kawng an lo zawh tawh a, kar kalta Thawhlehni, March 21, 2023 khan North Vanlaiphai khuaa MNF VC member te chuan MNF VC member an nihna atanga an inhnuhdawhna leh Independent VC siam tura ngenna Serchhip DLAO hnenah an lo thlen tawh a, hei hi Serchhip DLAO chuan LAD Directorate-ah a thlen tawh bawk a ni.
Hei bakah hian nimin khan North Vanlaiphai-a MNF Unit 5 te chuan Aizawl-a Mizo Hnam Run-ah an Seal an thehlut ve bawk a, North Vanlaiphai-ah hian MNF hian Unit 7 neiin heng zinga Unit I leh V tihloh, Unit dang zawngte chuan ruahmanna lo siam lawk tawh angin nimin khan an Seal te hi Mizo Hnam Run-ah an thehlut a ni.
Comments
Post a Comment