I Aadhaar data update a ngai ve tawh em?

Consumer te i harh ang u -XXXIX :

I Aadhaar data update a ngai ve tawh em?

- Laldinpuia

India rama cheng te tan chuan Aadhaar hi a pawimawh em em tawh a, Aadhaar neih theih tirh atanga a number la nei ve thei lo mi engemawzah an awm laiin Aadhaar nei tawh te pawhin an Aadhaar neih atanga kum 10 a tlin chuan an data an update leh vek a ngai dawn niin a lang. I Aadhaar i neih tan hun kha han chhut la, kum 10 a tlin tawh chuan i data update a ngai tawh tihna a ni.

Aadhaar Enrolment and Update Regulations, 2016-ah chuan Aadhaar number neitu ten an in enroll hun atanga kum 10 a tlin hunah an data te update thin turin ngen an ni a. Hemi behchhan hian Aadhaar lama thuneitu sang UIDAI (Unique Identification Authority of India) chuan India khua leh tui kum 10 hma lama Aadhaar Card lo nei tawh zawng zawngte chu an Aadhaar card te tihnun thar leh nan an nihna tihchianna(proof of identity) leh awmna hmun tihchianna(proof of address) te update leh vek turin tunhnaiah khan hriattirna a lo chhuah tawh a.

Aadhaar update hi Enrollment Centre leh Private Agency kaltlanga tih chuan Rs. 50 zel chawi tur a ni a, online a mahni a tih chuan Rs. 25 chawi tur a ni thung. Hemi chungchang kal zelah India khua leh tui mi tam zawkte tana awlsam zawkna ni turin Aadhaar update hi aadhaar website atanga ti te tan thla 3 chhung (March 15 atanga June 14, 2023 thleng) chu FREE in update theih anih thu March 15 khan sawrkar laipui-a Aadhaar thuneitu sang UIDAI chuan thuchhuah a siam a. He data update hi https://myaadhaar.uidai.gov.in/ kaltlangin a duh apiang tan tih theih a ni. UIDAI in aadhaar neihna rei tawh te an data update tura a ruahman nachhan hi sawrkar atanga hamthatna hrang hrang mipui ten an dawnna kawngah awlsam zawka thil kalpui a nih theih nan leh Aadhaar Card neituten an Aadhaar Card hmanna tur hrang hrangah awlsam zawka authentication an tih theih nan a ni. Hemi update a FREE a tih theih hi online hmanga mahni a tih tur a ni a, myAadhaar portal atang chauha tih theih a ni.

Hemi ti tur hian myaadhaar website https://myaadhaar.uidai.gov.in/ ah kan Aadhaar number hmangin kan lut ang a, kan Aadhaar nena in link mobile phone-ah OTP a lo thleng ang. OTP kan chhut hnuah Document update tih kha kan click leh ang a, tuna kan Aadhaar data awm mek a lo lang ang a, kan data te a dik vek chuan a dawt lehah kan click ang a, tah chuan Proof of Indentity (POI) leh Proof of Address (POA) update na a lo awm ang a, POI leh POA atana pawm theih document kan neih zinga a engemaw ber (a list ah thlan tur hrang hrang a awm) kan upload ang a, tichuan kan Aadhaar data chu kan update a ni mai. Hemi update atan hian Biometric update a ngaih loh avangin aadhaar neitu inlan kher a ngai lova, a document leh phone te a awm chuan in tihkep/intihsak theih a ni.

Tunah hian India rama cheng kan ni tih document proof (Proof of identity) atan hian kawng hrang hrangah Aadhaar hi hman theih deuh vek a ni tawh a. Central leh State Sawrkar programe leh scheme hrang hrang 1200 velah hian hamthatna dawngtu tur thlan nan Aadhaar hi hman a ni. Sawkar atanga hamthatna hrang hrang MGNREGS, Scholarship, Ration Buhfai, LPG Subsidy etc te tha taka kan dawn theih nan Aadhaar update hi a pawimawh hle a ni. Sawrkar laipuiin a thlawna tih theih hunchhung a hawn hi mipui a mamawh te chuan chhawr tangkai ngei I tum ang u.