Minister in Chakai Demonstration Farm tlawh

Fisheries Minister K. Lalrinliana chuan SEDP Pilot Project hnuaia Dumlui-a 'Chakai Demonstration Farm' kalpui chu nimin khan tlawhin he enchhinna hi a hlawhtlin chuan ei leh bar intodelhna kawng a mellung pawimawh tak a nih tur thu a sawi.

'Chakai Demonstration Farm' a tlawhna ah hian Fisheries Minister chuan lui sa zinga Mizote ngaihhlut leh ngainat tak Chakai chu thianghlim leh hnianghnar zawk tharchhuah a nih theih nan SEDP Pilot Project hnuaiah Chakai Demonstration Farm chu kalpui a nih thu sawiin, he enchhinna hi a hlawhtlin chuan luidung-a nungchate humhalh nana hmanraw tangkai tak a nih dawn bakah Chakai Farm siam chu eizawnna tlaka a hman theih tur thu a sawi bawk.

Nimin-a Dumlui-a Chakai Demonstration Farm tlawhna ah hian Chakai dahluh zingah no pai mek hmuh a ni a, Minister chuan heng Chakai note te hi hlawhtling taka enkawl chhoh an nih chuan Chakai Demonstration Farm hnuai a hmalakna chu hlawhtling thawkhat ah a ngaih theih thu a sawi a. Chakai Farm enchhinna kalpuina chuan hlawhtlinna nasa zawk a hmuh zel theih nan a viltu Department leh a hmun enkawltute chuan tihtak zetna nen theihtawp chhuah a thawk zel turin a chah a, he enchhinna hi a hlawhtlin chuan ei leh bar intodelhna kawng a mel lung pawimawh tak a nih tur thu a sawi bawk a ni.

DFDO, Kolasib-in a tarlan danin Chakai Demonstration Farm hi enchhina leh zirchianna a nih angin a tum ber chu Cemented pond/Tanks-ah Chakai vulh theih dan te, an inthlahpun dan, an than dan leh dam leh hrisel tak a vulh an nih theih nana an thil mamawh hrang hrang zirchianna atan a kalpui a ni a. June leh August, 2021 inkarah leh March 2022 khan hmun hrang hrang atanga Chakai lakkhawmte dahluh niin Fisheries Department leh ICAR-a mithiamten a huhoa endiknate an lo nei tawh a ni.

Comments

Popular News (Last 30 Days)

Bawngchawm tlang khualbuk rawktu nia hriat mi 2 man