Serchhip District-ah kumin hian Meikawng sial that loh vanga ram ti kang mi 10 chuang an awm
Serchhip District Fire Prevention Committee-a Member Secretary leh Thenzawl DFO ni bawk Lalbiakchama Chawngthu hnen atang LENKAWL in thu a dawn danin Serchhip District Fire Prevention Committee in thuthlukna alo siam tawh angin, March ni 15, 2023 thlengin Serchhip District-ah Lo leh huan hal a ni a, Lo/Huan hal hun ni hnuhnung bera Committee in a lo rel March ni 15 chu Serchhip District huamchhungah zawm a hlawh tha thawkhat hle nia hriat a ni a. Chutih mek laiin Sawrkar thuchhuah zawm tha tawk lo, a bik takin meikawng sial chungchangah an awm nual tih DFO chuan sawiin, Meikawng sial that loh avanga ram ti kang mi 10 chuang hmuhchhuah an nih thu leh heng mite hi fine tir an nihh thu sawiin, kangmei chhuak avanga FIR thehluh pakhat a awm thu a sawi bawk a ni.
District Fire Prevention Committee-a Member Secretary Lalbiakchama Chawngthu chuan Forest Survey of India (FSI) in March ni 15, 2023 hma lama Thenzawl Division chhunga kangmei a hmuh (Fire Points) a report chu 151 a nih thu sawiin, hemi zinga 150 te chu mimal leh Vantlang ram ah te an nih thu leh hmundang pakhat chu Forest Reserve chhungah a nih thu a sawi a. Heng ramkang te hian ram hectare 510.99 vel a ti chhia ni a chhut a nih thu leh Hectare 480 vel hi Lo/Huan atana Lo vah hal niin hectare 30 vel hi ramkang nia chhut a ni.
Tunhnaiah ruah a sur tak avangin kangmei a hlauhawm rih lo nia ngaih theih a nih thu Thenzawl DFO chuan sawi bawkin, amaherawh chu khaw thal hun chhung ala reh loh avangin kan fimkhur em em a tul thu a sawi a, “Kangmei chhuak tam tak hi April thla ah te a thlen thin avangin mitin I fimkhur zui zel ang u,” a ti bawk.
Tarlan tawh angin Serchhip District Magistrate chuan Serchhip District chhunga lo huan, leipui hal turte chuan March ni 15, 2023 aia tlai lovah hal vek tur a nih thu thuchhuah siamin a lo tarlang tawh a. He thupek bawkchhia te chu Section 188 IPC angin hrem theih a nih thu a tarlang tel bawk a ni.
Comments
Post a Comment