POSHAN Pakhwada hman mek pualin Serchhip-ah Millet atanga siam chawtha pawimawhna inzirtir a ni

Rampum-a POSHAN Pakhwada hman mek pualin nimin khan Serchhip-ah Millets (Buhtun) pawimawh zia leh mihring ei atana a that zia inzirtirna neih a ni a. Chawhnu lamah 'Millet based Tribal Food Fairs & Events on Millets Thali' neiin Millets atanga siam eitur chi hrang hrang phochhuah a ni bawk.

Serchhip DAO Office Meeting Room-a 'Sensitization and Awareness on Promotion of Millets based food item (Regional and Seasonal)' neih ah hian Serchhip ICDS Project-a CDPO Caryll Lalpari chuan POSHAN Pakhwada hi chawlhkar hnih chhung chawtha ei a pawimawh zia inzirtirna atan hman thin a nih thu leh kumin hi 'International Year of Millets' atana puan a nih angin Millets (Buhtun) that zia inzirtirna atan kumin hian hman nghal a nih thu a sawi a. Tunhma lam chuan Millets te hi ei uar thin viau mah ila tunhnaiah chuan kan ei uar tak loh thu leh Mizote chuan Millets zingah Buhtun leh Faisa chu kan ei a nih ber thu a sawi a. Heng Millets lam thil chi hrang hrang te hi kan ei uar a nih chuan Zunthlum leh Thisensang bakah natna dang tam tak hi kan pumpelh theih thu a sawi bawk.

Serchhip CDPO chuan kumin a POSHAN Pakhwada hman mek pual hian 'Food Fairs' pawh buatsaih a nih thu leh amaherawh chu Millets atanga thil siamchhuah hi chi thum chiah an hmuh theih thu an sawi a. Hei bakah hian POSHAN Pakhwada pual hian naupang hrisel thlanna neih a nih dawn thu a sawi a. Sawrkar Laipui ruahmanna angin ICDS hnuaia Anganwadi te thuamchakna tur leh an hmalakna huang zauhna turin Saksham Anganwadi kalpui a nih dawn thu a sawi bawk a. He hmalakna hnuaiah hian naupang kum 6 hnuailam te, nu naupai leh naupawm bakah tleirawl kum 14-18 te tan a thlawnin kum khat ah ni 300 chhung Supplementary Nutrition (chawtha chi tinreng) pek an nih dawn thu a sawi a, be hamthatna dawng tur hian Aadhar Card neih a tul thu a sawi bawk.

Nimin a he hun hman hi Poshan Serchhip District-a District Coordinator James Lalremliana chuan kaihruaiin Serchhip DAO Office-a Asst. District Agriculture Officer R. Lalrinawma chuan Millets nihphung leh a chin dan te leh ei atana a thatna te a sawi a. Chawhnu lamah Serchhip DAO Office Conference Hall-ah 'Millet based Tribal Food Fairs & Events on Millets Thali' chu neih chhunzawm nghal a ni a, he hunah hian Serchhip ICDS, SHG leh mimal ten Buhtun atanga siam eitur chi hrang hrang phochhuakin an siam dan te an sawifiah bawk a ni.