Latest News

Aizawl-ah AB PM-JAY kalpui dan thlirletna neih a ni

 Health Care Scheme changtlung tak neih a pawimawh - Chief Minister

Chief Minister Zoramthanga chuan nimin khan Aijal Club-ah ni 2 awh tur AB PM-JAY hmalak dan thlirletna hun, Ayushman Sangam - North Eastern Regional Review Meeting chu hmanpuiin, mi khawsak harsa ber pawhin inenkawlna an mamawh ang an hmuh theihna tura Health Care Scheme changtlung tak neih a pawimawh thu a sawi.

Ministry of Health & Family Welfare in Ayushman Bharat Pradhan Mantri Jan Arogya Yojana (AB PM-JAY) kalpui tura ruat, National Health Authority (NHA) bultuma he Review Meeting-ah hian Chief Minister Zoramthanga chuan hriselna chu mihring nun a thil hlu berte zing ami, ram hmasawnna atan pawh a thil pawimawh tak a nih thu sawiin, mi khawsak harsa ber pawhin inenkawlna an mamawh ang an hmuh theihna tura Health Care Scheme changtlung tak neih a pawimawh thu a sawi a. Sawrkar laipuiin he Health Care Scheme a kalpui hma kum engemawzat ah Mizorama hman tur State Health Care Scheme ruahman a lo nih chhoh dan sawiin, sum tam tak dah theih a nih loh avang leh chhan dang dang avangin a nih tur anga kalpui a nih theih loh dan te, kum 2018 kum tawp atang khan tharthawh lehin, tunah chuan sawrkar laipui Scheme nen kal kawpin, tichangtlung zelin huam zau zawka buatsaih zel tum a nih thu a sawi bawk.

NHA CEO S. Gopalakrishnan chuan he Scheme hi a tam thei ang bera mi in an hman tangkai a, a mamawhtu ten enkawlna tha an hmuh mai bakah mahni inenkawl tha te an hriat theih nan thahnemngai taka hma la zel turin a chah a. AB PM-JAY sum hman dan chungchang leh State tin AB-PMJAY hmalakna leh dinhmun sawihona neih zui nghal a ni bawk.

He huna a tarlan danin hmarchhak State pariat zingah Assam chuan AB-PMJAY beneficiary 30,03,069 neiin a tam ber a, Sikkim-in 44,228 neiin a tlem ber thung a, Mizoram-ah beneficiary 2,16,584 an awm bawk a ni. Assam, Megha-laya leh Nagaland chuan PM-JAY hi State Health Care Scheme nen thlungzawmin a kalpui a. Sikkim leh Tripura chuan State Health Care Scheme hran an kalpui lo thung.

Comments

Popular News (Last 30 Days)