Zozia Silk & Handloom te chawimawina hlan

Commerce & Industries Department changtu Minister Dr. R. Lalthangliana chuan nimin khan Zozia Silk & Handloom (Laltanpuii) hnenah National Merit Certificate Award a hlan.

Silk Puanchei tah kawnga a thiamna leh hnathawh that avangin Ministry of Textiles, Govt. of India hnuaia Development Commissioner for Handloom (DC Handloom) chuan Laltanpuii hnenah hian National Merit Certificate Award hi a hlan a. He Award kum hi kum 2018-a dawn tur kha niin hripui leng avangin kumin 2023 hian a dawng kim thei ta chauh a ni. Zofate zingah Handloom lama National Award dawng thei pahnihna niin Zodinpuii (L), Tuikhuahtlang-in kum 1988-a a dawn hnua dawng leh thei hmasa ber a ni a, he Award hian Certificate leh Rs. 75,000 a keng tel a ni.

Directorate of Sericulture Conference Hall-a Award hlanna hun nimin-a neih ah Minister Dr. R. Lalthangliana chuan Laltanpuii’n rampum huap chawimawina a dawng thei chu lawmawm a tih thu leh a lawmpui takzet thu a sawi a, a inzir zel peihna leh taimakna chu entawntlak a tih thu leh a hlawhtlinna chuan midangte a fuihphur a beisei thu a sawi a ni. Minister chuan Commerce & Industries leh Sericulture-te chu Department inhnimhnai tak, in mamawh leh inchawimawi tawn thin an ni tih sawiin, Mizo fate chu tih takzeta an beih chuan thil thiamchak tak an nih thu leh International Market thleng phak tura ngaihtuahna seng zui zel turin kalkhawmte chu a fuih bawk.

He hunah hian Sericulture Department changtu Minister Er. Lalrinawma pawhin a Department chan hnuaiah National Award dawng thei an awm chu ropui a tih thu sawiin, Laltanpuii Award dawn chu hmeichhe chawikanna kawngah hmasawnna pawimawh tak a nih thu a sawi bawk a ni.

Laltanpuii hnena National Merit Award Certificate petu Development Commissioner for Handloom hi India rampumah puantah lama hmasawnna tura sulsutu ber niin, an hnuaiah hian Indian Institute of Handloom Technology 6 (paruk) leh Extension Centre 2 (pahnih) bakah Weaver Service Center 29  an nei a. DC Handloom hian puantah lama mi chungchuangte chawimawina chi thum – Sant Kabir Award, National Award leh National Merit Certificate Award chawimawina te an pe thin a ni.

Laltanpuii hian Award a dawn theih nan hian puantah lai video leh thlalak te, Weaving Technique lama a thiam dan, inches khata 600 ends a zeh dan te telin document 26 zet a thehlut a. Hemi hmalam hian chawimawina thenkhat pawh a lo dawng tawh bawk a ni.