Inthlanna felfai leh thianghlim a awm theih nan Serchhip-ah Political Seminar neih a ni
MPF General Hqrs. leh MPF Serchhip District te buatsaih ‘MPF District Level Political Seminar’ hi Serchhip Kawnpui Kohhran Diamond Jubilee Hall-ah neih niin chawhma lamah MPF Serchhip District-a President Rev. Zohmunmawia chuan a kaihruai a, nikum lama MPF Serchhip District thukhawmin a lo ruahman tawh anga Political Seminar hi buatsaih a nih thu sawiin, Ram chu Lalpa ta a nih thu leh he khawvel-ah Pathian ram a lo thlen theihna tura inthlanna felfai leh thianghlim neih a pawimawh thu te a sawi bawk a. Hemi hnu hian MPF Serchhip District Secretary R. Sanghmingthanga pawhin Political Seminar an buatsaih chhan te a sawi bawk a ni.
‘MPF District Level Political Seminar’ hi MPF General Secretary Rev. Lalramliana Pachuau chuan rawn hmanpuiin chawhma lamah ‘Party ruihchilhna in Ram leh Mipui a nghawng dan’ tih Rev. MS. Dawngliana ziak chu zirho a ni a, chawhnu lamah Rev. H. Biakthangsanga kaihhruaiin ‘Sawrkar tha siam tura mipui mawhphurhna’ tih Rev. Dr. Lawmsanga ziak chu zirho leh a ni bawk a, heng thupui te hi sawihona neih zui nghal a ni bawk a. He hunah hian Serchhip-a Political Party hrang hrang hruaitute, Assembly bial tin-a MPF aiawhte leh Serchhip Town chhunga MPF Local Forum hruaitute bakah MPF Serchhip District-a Executive Member te an tel a ni.
He hun rawn hmang tur hian MPF General Secretary Rev. Lalramliana Pachuau bakah Synod Revival Speaker Lalremruata leh Lal-nuntluanga Pudaite te rawn kalin Inrinni zan atang khan Serchhip khawpui chhunga Presbyterian Kohhran hrang hrangah Political Seminar hi neih zui a ni a. Inrinni zan khan Kohhran pathum ah Aizawl atanga rawn kal te hi Resource Person atan hmangin nimin chawhnu khan Chhiah-tlang-a Kohhran pathum-ah hun an hmang leh a, nizan khan Serchhip-ah Kohhran pathum ah hun hman chhunzawm a ni bawk.
Comments
Post a Comment