Serchhip END ten Heroin No. 4 tam tham tak man

Serchhip-a Excise and Narcotics Department chuan nimin zing khan Thenzawl dai-ah Heroin No. 4 Hawng 30 zet an man a, hemi kaihhnawih ah hian mi pathum leh lirthei pahnih an man bawk.
Serchhip-a Excise and Narcotics Department te hian nimin zing dar 3:00 vel khan Chalkhankawn leh Thenzawl inkara Muallet ram-ah Champhai lam atanga rawn ken nia hriat heng damdawi te hi an man a, damdawi an man te hi Sahbawn bawm 30-a dah niin a vaiin gram 396.44 a rit niin a neitu nia hriat Lalpanliani (48), Zokhawthar nia insawi pawh man nghal a ni.


Lalpanliani hian Taxi (Alto 800) pahnih, Mz-04-8044 leh Mz-04/A-6512 te rawn hmang thlain heng damdawi te hi a rawn keng nia hriat a ni a, Motor pakhat ah hian amah chuangin pakhat zawkah hian ruihhlo te hi phurh a ni thung a, motor khalhtu Lalropeka (29), Kahrawt Veng Champhai nia insawi leh Lalnuntluanga (32), Champhai Dinthar nia insawi te pawh man nghal an ni bawk. Heng damdawi te hi Thenzawl leh Serchhip-a pek tur niin a kengtute hian an sawi a, Excise and Narcotics Department chuan thubuai an siam sak nghal a ni.

Hemi hnu nimin tlai dar 4:30 vel khan Serchhip Bazar-ah Heroin No. 4 Hawng li (4), gram 50.7 chu L. Bat (48), Khawmawi, Myanmar nia insawi hnen atangin Excise & Narcotics Department hian an man leh a. Hei bakah hian nimin tlai dar 4:30 vel bawk khan Lianthangpuii (49), Serchhip Chhim Veng nia insawi hnen atangin Heroin No. 4 Hawng thum, gram 47.08 a rit chu Serchhip Bazar Hnuai-ah an man leh bawk a, heng mite hi thubuai siam sak nghal an ni bawk.

Comments

Popular News (Last 30 Days)

LPG man bithliah thar