Governor in RIPANS-a hnathawh mek a sawipui

Regional Institute of Paramedical and Nursing Sciences (RIPANS) tihlen tumna atana hnathawh mek te leh thlen chin te chu nimin khan Governor Hari Babu Kambhampati chuan RIPANS Director leh Contractor te a sawipui.

Raj Bhavan-a he sawihona ah hian Governor Hari Babu Kambhampati chuan RIPANS, Aizawl-a zirtirtute leh Office Staff te inpekna zarah Mizoram-ah Nursing, Pharmacy and Paramedical Sciences zirna tha tak a awm mek thu leh Mizoram tan mai ni lovin India hmarchhak State 8 te tana malsawmna a nih thu a sawi a. RIPANS atanga zirchhuak tawh zawng zawng atanga chhuta 93% laiin hna tha tak an hmu thei chu hlawhtlinna ropui tak a ni tih a sawi bawk.

Governor chuan RIPANS tihchangtlunna tura hnathawh mek chu a lo beisei aia thaa thawktu ten an vil chu lawmawm a tih thu pawh sawiin, Contractor te pawhin an intiamkamna te bawhchhe loa a hun pangngai chhung ang deuhthaw a hmain an hna an thawk zo thei tur chu lawmawm a tih thu a sawi a. Mizoram-ah Project tam zawk a zawh tur hun aia kum 5 leh aia tlai-ah te zawh theih hram a ni thin chu tih tawp a ngai a ni, a ti bawk.

Regional Institute of Paramedical & Nursing Sciences (RIPANS), Aizawl hi kum 1995-1996 khan North Eastern Council (NEC) hnuaiah din niin April 1, 2007 khan Ministry of Health & Family Welfare in a enkawl a. Tunah hian RIPANS, Mizoram Nursing (BSc, MSc), Medical Laboratory Technology (BSc, MSc), Radio Imaging Technology (BSc), Pharmacy( B.Pharm, M.Pharm leh Ph.D in Pharmacy) leh Optometry (B.Optometry) ah te zirtirna a kalpui mek a. Kumtin Course hrang hrang belhkhawm a seat awm zat chu 259 niin tunah hian semester hrang hrangah zirlai 812 an awm mek a. India ram chhunga Nursing, Pharmacy and Paramedical Sciences te hmunkhata zirna kalpuina awm chhun leh Ministry of Health & Family Welfare in a enkawl awmchhun a ni.

Ministry of Health & Family Welfare chuan cheng vbc. 350.59 hmangin RIPANS tihchangtlun hna hi a thawk mek a. Heng building te, a thawktu lak tur leh a thuamna bungrua te hi peihfel a nih chuan kum khata zirlai lakluh theih zat chu a letin a pung dawn a. RIPANS tihchangtlungna kalpui mekah hian Khum 100 awmna Hospital, Staff & Nurse Quarter 18, Seat 168 awm theihna Hostel Building, Doctor quarter 22, Academic Block–IV (18 nos Class room, 32 nos Labs, 2 nos Lecture Theatres, 6 nos HoD Rooms) leh mi 1200 thut len theihna tur Indoor Sports Complex & Auditorium sak hna te a tel a ni.