Kumin ah Mizoram-ah ruahtui a tla har

State Meteorological Centre chhinchhiah danin kumin hian Mizoram-ah ruah a sur har a, ruahtui pawh a tlem rih. State Meteorological Centre chhinchhiah danin, Aizawl-ah kumin ah ni khat chauh ruah a la sur a, March ni 15 (Nilaini) khan ruahtui mm 19.4 a tla a ni.

Mizoram-ah hian ruah hi kum khat chhungin thla tin a sur deuh ziah a, nikum pawh khan thla tin surin nikum January-ah khan mm 23.9 a tla a, February-ah mm 17.2 tla lehin kuminah erawh January leh February-ah ruahtui tla a awm lo a. Nikum January thlaa ruahsur hi tam lo angin lang mah se January thlaa sur-ah chuan a tlem loh thu leh February thlaa mi pawh hi February thlaa sur atan chuan a tlem lo niin an sawi.

State Meteorological Centre chhinchhiah danin, nikum khan ruahtui a tam bakah a pung a; kum 2021-ah mm 1917.6 leh kum 2022-ah mm 2015.1 a tla bawk a ni.

Directorate of Science and Technology hnuaia State Meteorological Centre hian sik leh sa leh khawchin hi kumtin an chhinchhiah a, an chhinchhiah china Mizoram-a ruahtui tam ber kum chu kum 2017 kha niin mm 2686.7 a tla a. A tlem ber kum chu kum 2019 kha niin mm 1518.2 a tla bawk a ni.