Kil tin atanga hmun hrang hranga ruihtheihthil lut lo danga lo do hneh tur chuan kan vai tan a ngai - Chief Minister

Chief Minister Zoramthanga chuan Ruihhlo, Zu leh sualna dang dang min hnukhniamtu chu huaisen taka kan sut a, eng bawih ah mah tang lo tura huaisenna leh tumruhna neih a pawimawh thu sawiin, “Kil tin atanga hmun hrang hranga ruihtheihthil lut lo danga lo do hneh tur chuan kan vai tan a ngai a ni,” a ti.

Mizoram Police in 71st BN Mullik Memorial All India Police Football Championship 2022-23 a an Champion lawmna nimin-a 1st Bn. MAP Ground, Armed Veng-a an buatsaih a hmanpuina ah he thu hi sawiin Chief Minister Zoramthanga chuan Mizoram chu thenawm ram nena ramri intawm a nih avanga dan phalloh hrang hrang tawlhluhna kawnga hman a nih dan te, chumi dolet a lo dan hna chu thil pawimawh tak a nih thu leh heng ah hian Police pawimawhna a sawi a. Kil tin atanga hmun hrang hranga ruihtheihthil lut lo dang a lo do hneh tur chuan kan vai tan a ngaih thu leh Ruihhlo, zu leh sualna dang dang min hnukhniamtu chu huaisen taka kan sut a, eng bawih ah mah tang lo tura huaisenna leh tumruhna neih a pawimawh thu a sawi a. Tumruhna chu mihring chawikangtu, hnehna thlen a, kan ram chawikangtu tur chu a nih thu sawiin, All India Police te Football intihsiakna a Champion Mizoram Police Football player te leh anmahni buaipuitu zawng zawng a lawmpui thu a sawi bawk.

He hunah hian khual Zahawm Home Minister Lalchamliana pawhin kum 2008 kha Sports quota a Police ah mi lak hnuhnun ber a nih thu leh, chuti chunga kum sawm a chuan hnu pawha India ram pum Police zinga Football Champion an ni thei chu thil ropui tak nia a hriat thu a sawi a, Police Football Team te hlawhltinna chu tawp mai lova, a aia tha lehzuala hmasawn zel turin duhsakna a hlan bawk.

71st BN Mullik Memorial All India Police Football Championship 2022-23 hi March ni 11-21, 2023 chhung khan Sri Nagar-ah neih niin All India Police Sports Control Board in a buatsaih thin a ni a. Team 34 telin Mizoram Police Team te hian Final Match ah 1-0 in Assam Rifles chu hnehin an Champion a, he Tournament chhung hian Mizoram Police goalkeeper Const. F. Lalmuanawma chu Best Goalkeeper a thlan a ni bawk.

Mizoram Police hi kum 1993 (Aizawl), 1996 (Shillong) leh 2012 (Patna) ah te pathumna dinhmun hauh tawhin tun tum hi an vawi khat Champion-na a ni.

Comments

Popular News (Last 30 Days)

Vawiin-ah HSSLC Exam result

LPG man bithliah thar