Latest News

Aizawl-a Assam Rifles ram chhunga LSC leh House pass neite ni 30 chhunga insawifiah tura hriattir an ni

Land Revenue and Settlement Director chuan Assam Rifles chhuahsan tur ram luah chhunga LSC leh House pass lo neite chu insawifiah turin a ti.     Zirtawpni khan Revenue Director K.Laldingliana’n Assam Rifles ram luah huam chhunga LSC leh House Pass lo neite chu Mizoram Land Revenue Act, 2013 section 33 (2) tlawhchhanin insawifiah turin a ti a, Assam Rifles luah chin ram chhungah hian Mizo District Land Revenue Act, 1956 section 8-na tlawhchhanin mimal in ram neih theih a ni lo nia sawiin, Revenue Officer-te thu dik lo hmanga bum vanga lo nei ve ngawtah a puh a. Chubakah mipui tana thil tha lo tak, The Mizoram (Restriction on use of Transferred Land) Act, 2002 kalh a ni bawk a ni, a ti a. Ram neitute chu ram an neih dante sawifiah a, an mimal ram LSC leh House pass-te chu cancel a nih lohna chhan sawi turin a ti a, Show Cause notice hi ni 30 chhunga chhâng turin Director chuan Assam Rifles ram chhunga ram neite chu thu a pe bawk.

    Hetihlai hian MNF Sr Vice President, Deputy Chief Minister ni bawk, Tawnluia chuan cabinet meeting-in Assam Rifles rama LSC neite cancel turin a ti tawh niin March ni 24, 2023 khan Mizo Hnam Run, Lungleiah thuthar thehdarhtute a kawmnaah a sawi a, Dy. CM chuan Assam Rifles sawn chhuak tura Laldenga hma lo lak tawhna chu bawhzui zel a ni tih a sawi a, Chief minister hmalakna avangin AR an inthiar chhuak tan niin a sawi bawk. Tawnluia chuan, “AR chhuahsan tur ram hi mi mal kuta a luh loh nan dân siam a nih mai bakah cabinet meeting pawhin AR rama LSC neite cancel hi a rel tawh a. AR ram chhuahsan tur hi mipuite tan tangkai taka hman a ni dawn a ni,” a ti.
    Thulakna tarlan danin Assam Rifles ram chhungah LSC nei mi 61 an awm a, sawrkarin ngenna a lo siam tawh angin heng zinga mi pariatte chuan he lai ram chhunga an LSC an surrender tawh a ni.

Comments

Popular News (Last 30 Days)