Reiek-ah Zofest hriatrengna lungphun hawng

MZP in Reiek khuaa Zofest 2018 an buatsaih hriatrengna lungphun chu niminpiah khan an hawng.

Mizo Zirlai Pawl (MZP) hian kum 2002 atang khan Zofate kan insuihkhawm theih nan leh khawvel hmun hrang hranga Zofate kan inpawh lehzual theih nan, Zo hnam inkawmpui lian Zofest hi an lo buatsaih tawh thin a. Zofest hmasa ber chu kum 2002 khan Churachandpur (Manipur)-ah neih niin, Aizawl (Mizoram), Darchawi (Tripura), Haflong (Assam), Zokhawthar (Mizoram), Reiek (Mizoram) leh Sialsuk (Mizoram)-ah te neih a lo ni tawh a ni. Heng Zofest neih tawhna hmunahte hian Zofest hriatrengna lung phun vek nise tia an rel angin, Sialsuk-ah leh Reiek-ah te hian lung hi phun a ni ta a ni.

Reiek-a Zofest Hriatrengna lungphun hi MZP President hlui C. Lalrokhuma chuan hawngin MZP chuan Zofate mamawhna zawn zelah hma a la thin tih sawiin, “Hun hmasa lamah Zirna leh thu leh hla tihhmasawn a nih theih nan ke a lo pen tawh a, remna leh muanna a awm theih nan a thawhhlawk hle bawk. Ram leh hnam tan ke a pen chho zel a, Zofate kan insuihkhawm theih nan hma a la chho leh a, rah duhawm tak a chhuah mek zel a ni,” a ti bawk.