State lian leh hausa zawk, economy dinhmun tam zawkah leiba zat a tam zel - Chief Minister

Chief Minister Zoramthanga chuan State lian leh hausa zawk, economy dinhmun tam zawkah leiba zat a tam zel thu sawiin, Mizoram chu State dangte nen khaikhin chuan leiba nei tlem ber te zing ami niin, a aia leiba nei tlem chu Sikkim chauh a awm thu a sawi bawk.

Mizoram Journalists' Association (MJA) in an member te tana State Budget inzirtirna, Seminar on Mizoram State Budget nimin-a Aijal Club-a an buatsaih a hmanpuina ah he thu hi sawiin Chief Minister Zoramthanga chuan kum engemawzat Finance Department changtu Minister a lo nih tawha a tawnhriat leh tun sawrkar sum dinhmun te a tarlang a. Chief Minister chuan Budget siam a nih hian a siamtute'n an hman dan tur leh sum mamawh dan tur a vaiin chiang taka an hriat lawk vek theih loh avanga a kar laka mamawh belh te, sum hmuh danah te danglamna a lo thlen in a tul anga Supplementary Demand siam a tul chang a awm thu a sawi a. Loan lak chungchang sawi bawkin, kawng hrang hranga hmasawnna hna hrang hrang thawhna tur loan lak a nih thin thu sawiin, a rulh dan chungchangah tunhma chuan 90% te India sawrkarin rulh sakin 10% chuah State in a tum thin a, tun hnuah tihsan a nih thu sawiin, tuna ADB atanga Health Care atana sum puk pawh sawrkar laipuiin 72% a rulh tur thu a sawi a. State leiba chungchangah Mizoram chu State dangte nen khaikhin chuan leiba nei tlem ber te zing ami niin, a aia leiba nei tlem chu Sikkim chauh a awm thu a sawi a. State lian leh hausa zawk, economy dinhmun tam zawkah leiba zat a tam zel thu a sawi a ni.

Chief Minister chuan COVID-19 hripui leng avanga sum dinhmun Vawiin thlenga a la nghawng dan chungchang pawh sawiin, a hmanna tur bituk sa, Project Based sanction chu kawng siamna tura tih te, khelmual siamna tura tih leh adangte chu a rawn luh thu leh chung sum chu vaibelchhe tam tak pawh lo ni mahse sawrkar hnathawk hlawh emaw, hmasawnna hna dang thawhna atana lo pawh pen theih a nih loh thu a sawi a. Chutiang nilo, sawrkar hlawh leh thildang atana hman theih tur 'Untied Fund' chu sum indaihloh an sawi chhan ber a nih thu leh, chu chu State tin atanga sawrkar laipui atanga Chhiah tlingkhawm atanga State in an dawn ve tur 'Share of Taxes' te, Revenue Deficit Grant te, State in an thawhchhuah Chhiah chi hrang hrang lakkhawm te, hmundang atanga ba rulhna hmuh leh a danga hmuh a nih thu a sawi a. Sawrkar laipui remtihna vek behchhana budget siam a nih hnuah Covid hripui leng avangin chung Share of Taxes leh hmun dang atanga sum hmuh tur ang an hmuh tak loh thu a sawi a. State in a hmuh theih tur a hmuh tak loh chu chhut in vbc. 3000 bawr vel chu a nih tur thu a sawi bawk.

Chief Minister chuan sawrkar laipui atanga sum hmuh innghat tih chungchangah, sawrkar laipui chuan a hranin ramri kham emaw, mipui emaw a nei lo tih a sawi a. India ram chuSstate leh UT te ta vek a nih avangin State leh UT ten hmasawnna hna an thawhna tur sawrkar laipuiin a kawl sak ang zawng pawha a ngaih theih thu a sawi a. Heng sum hi hmang tangkai turin project siam a zuk haichhuah a tul thu a sawi bawk.

MJA member te tana Budget zirhona hun hi MJA General Hqrs. President C. Lal-rambuatsaiha chuan kaihruaiin Resource Person atan Finance Department-a Addl. Secretary Ramchuana MFAS chu hman a ni a. Ani hnen atang hian Budget kalphung leh hemi kaihhnawih a thuthar thehdarhtute tana hriat tur pawimawh hrang hrang zirho a ni.

Nimin-a he zirhona hunah hian Aizawl a MJA member te bakah District hrang hranga MJA hruaitu thenkhat te telin sawihona hun hman nghal a ni bawk.