Rullam khaw luah leh kum 50-na lawmin Rullam khaw mi Martar hriatrengna lung phun a ni

Serchhip District-a Rullam khua chuan an khaw luah leh kum 50-na chu nimin khan lawmin bialtu MLA leh Minister Er. Lalrinawma chuan khuallian niin a hmanpui a. Hemi rual hian Zoram buai laia ram leh hnam tana Martar, Rullam a mite hriatrengna lungphun a hawng bawk.
Rullam khuaa nimin-a he hun hmanna ah hian Er. Lalrinawma chuan Haw khawm runpui leh khaw luahleh kum 50 na hmang theia Rullam khuain malsawmna a dawng chu lawmawm a tih thu sawiin, an khawmi ram tana Martar te hriatrengna lung phun nachang an hria chu ropui a tih thu a sawi a. He hun hlu takah hian khawtlangah inremna leh lungrualna lo par vul zual se, malsawmna tam tak khawtlangin dawng zel thei se a duh thu a sawi bawk a. Kum tam tak khawtlang leh mipuite tana lo thawk tawh thinte fakin, anmahni avangin hetiang hun duhawm leh chhinchhiah tlak kan hmang thei a ni, a ti bawk.

Rullam khawtlangin Martarte puala lung an phun chu ropui a tih thu pawh Er. Lalrinawma chuan sawiin, “Kan ram leh hnam a boral loh nan Hnam-ah kan thanharh a ngai a, kan hnam tana martar te thisen luanna rama chengte hian kan pasalthate chawimawi nachang kan hriat hi a tul hle a ni,” a ti a. “Vawiin ah hian kan ram leh hnam tana an duh leh beisei an hlenchhuah hman tak lohte hre rengin, kan hmaa awmte rinawm taka kan thawh zel a tul a. Hnam fing apiangin an Hnam Martar te an zahin an ngaisang thin a, an thiltih an ngaihlu bawk thin. Kan hmaa lokal tawhte hnungzuiin mitinin kan eizawnna leh kan hnathawhna hrang hrangah ram leh hnam hmangaihna i pu thar zel ang u,” tiin he huna kalkhawmte chu a sawm bawk.

Nimin-a Ram leh hnam tana Martar mi 7 te hriatrengna lungphun hi Rullam khawtlang buatsaih niin khawtlang huap in Vuttaia Run-ah hun hman zui a ni a, he hun hi Lalringliana chuan kaihruaiin Khualzahawm Zomuana leh Ex-MNA Gen. Hqrs. Treasurer Vanropuia Sailo te pawhin thu an sawi a ni.