Mizoram-ah HIV/AIDS kai 27,876 hmu tawhin thalai zingah HIV/AIDS a hluar mek zel

Mizoram-ah HIV/AIDS kai hmuhchhuah an nih kum 1990 atanga kumin January thleng khan HIV/AIDS vei hmuhchhuah mi 27,876 an awm tawhin thihpui mi 4,005 an awm tawh a, HIV/AIDS vei hmuhchhuah tam berte chu thalai, kum 25-34 inkar an ni.

Mizoram State AIDS Control Society (MSACS) chhinchhiah danin, Mizoram-a HIV hrik pai hmuhchhuah hmasak ber chu kum 1990 October thla khan hmuhchhuah niin hemi atanga HIV hrik pai hmuhchhuah tawh zawng zawng chu mi 27,876 an ni a, heng zinga 22,498-te chu ART Centre-ah an in-register tawh a, kum kal mek 2022-23 (April - January) thlenga HIV vei hmuhchhuah chu mi 1,783 niin, chu chu thisen endik zawng zawng atangin za a 4.2 a tling. Tunhnai kum 10 (2013-14 atanga 2022-23) chhunga HIV vei hmuhchhuah tam ber kum chu kum 2018-19 niin mi 2,765 hmuhchhuah an awm a, chu chu thisen endik zawng zawng atangin za a 5.7 lai a tling phak a ni.

Kum kal mek chhungin nu naupai HIV vei hmuhchhuah mi 133 (0.7%) an awm tawh a, kum kalta, 2021-22-ah nu naupai HIV vei hmuhchhuah mi 177 (0.9%) an awm bawk a. HIV/AIDS kaina tam ber chu mipat hmeichhiatna hman atang niin, kum kal mek chhunga HIV vei hmuhchhuah mi 1,783 zinga 1,143 (64.1%) chu mipat hmeichhiatna atanga kai an ni a. Inchiuna hriau inhmantawm atanga kai 586 (32.9%) an awm bawk. 

Kum kal mek a HIV hri kai hmuhchhuah zinga a tam ber mi 720 (40.4%)-te chu kum 25-34 inkar an ni a, kum 35-49 inkar mi 564 (31.6%) awm bawkin, kum 15-24 inkar mi 318 (17.83%), kum 50 chung lam mi 137 (7.68%) leh kum 14 hnuai lam mi 44 (2.46%) hmuh-chhuah an awm bawk a ni.

Comments

Popular News (Last 30 Days)

Vawiin-ah HSSLC Exam result

LPG man bithliah thar