Governor in P&E Department hotute Kawlphetha tam zawk siam dan tur a sawipui

Governor Hari Babu Kambhampati chuan nimin khan Power & Electricity Department hotute Raj Bhavan-ah kawmin tuiluang chakna hmanga Kawlphetha tam tham zawk Mizorama siamchhuah dan tur chungchang an sawiho.

He hunah hian P&E Department hotute hi H. Lalengmawia, Commissioner & Secretary hova telin P&E Department in DPR an siam tawh 5 te sawifiah hmasain Project dang 4, Investigation kalpui mekah te pawh an sawifiah bawk a. Governor chuan tunhnaiah Mizorama luiluang khuah theih hmanga Kawlphetha siamchhuah chungchang chu Prime Minister Narendra Modi a sawipui tih a sawi a. Prime Minister chuan he thil hi tha takin a lo ngaihthlak sak thu leh State Level-ah lo enfiah hmasak a nih hnuah a tul dan azira hmalak tha a tih thu a sawi tih a tarlang a. Mizoram chhungah Kawlphetha siamchhuah tur tam tak awm mek chu hman tangkai thuai ni se tha a tih thu sawiin, P&E hotute chu thil awmzia a zawtfiah bawk a ni.

P&E Department hotuten Powerpoint presentation an pek dan chuan tunah hian DPR siam zawh vek tawh 5 a awm mek a. Heng te hi - kawlphetha MW 460 pechhuak thei tur Kolodyne-II HEP te, mw 210 pechhuak thei tur Tuival HEP te, MW 80 pechhuak thei tur Bairabi Dam Project te, MW 24 pechhuak thei tur Tuirini HEP leh MW 24 bawk pechhuak thei tur Tuivawl HEP te an ni a. Project 4 dang pawh kalpui theih a ni em tih enfiah mek a ni bawk. Chung te chu - Tuipui HEP, Tuichang HEP, Mat Sekawi HEP leh Tlawng HEP te an ni.

Governor chuan DPR siamsa awm mek te chu tha thawkhat nia a ngaih thu sawiin, Ministry of Power te sawipui hmasa phawt turin P&E Department hotute chu thurawn a pe a. Hemi hnuah hian DPR neih sa te chu Prime Minister Office (PMO)-ah Power Secretary leh a thawhpui ten presentation tha taka siamin thehlut se tha a tih thu a sawi a bawk. Governor chuan Kawlphetha siamchhuahna atana Power Pant siam nan sum tam tham hman a ngaih avangin Central PSU lian zawkte pawh thawhpui dan zawng turin P&E hotute chu thurawn a pe bawk.

Tunah hian Mizoram State in Kawlphetha a mamawh zat atanga tam tam tak chu State pawn atanga lei mek a ni a. Heng power plant- AGBPP (NEEPCO), AGTCCP (NEEPCO), Baramura-IV (TPGL), Baramura-V (TPGL) leh Palatana Plants atang te hian kumtin cheng vbc. 400 vel sengin Kawlphetha hi lei thin a ni. Nimin-a inkawmna ah hian Nizung chakna hmanga Kawlphetha siamchhuah belh theih dan te pawh sawiho a ni bawk.

Comments

Popular News (Last 30 Days)

Vawiin-ah HSLC result

Vawiin-ah HSSLC Exam result