MNYF thuchhuah belhchian dawllo niin tarlang

 Mizoram Pradesh Congress Committee (MPCC) chuan MNF Thalaite thuchhuah siam chu thu belhchian dawl lo niin an sawi.

Nimin a thuchhuah an siamah MPCC Media Department chuan tun thla ni 25-a MNYF ten ‘LMC awm dawn mahse Lunglei-ah mipuite’n ni 100 inhlawhna an kalpui zel theih nan MNF sawrkar chuan Budget-ah a dahfel tawh’ tia thuchhuah an siam chu thu belhchian dawl lo nia sawiin, dawt a nih zia pawh kum 2023-2024 Budget Document atanga awlsam taka finfiah mai theih a ni tih an tarlang a. “Sawrkar kum thar tur, 2023-2024 ah hian Ni 100 inhlawhna (MGNREGS) atan sawrkar laipui (CSS) atangin cheng nuai 11,000 hmuh beisei a ni a, hei hi sawrkar kum kal mek 2022-2023 chhunga hmuh tur zat a chhut cheng nuai 22,462 aiin cheng nuai 11,462 zetin a tlem zawk a ni,” tiin LMC ding mai tur Lunglei mipuite tan hian Budget-ah engmah an dah lo zawk tih a chiang hle niin an tarlang bawk.