Health Care-a inziahluhna hun hawng leh mek

Kum 2023-2024 atan Mizoram State Health Care Scheme hnuaiah inziahluhna hun hawn leh mek a ni a, MSHCS-ah hian Ration Card mil-a inziahluh tur niin Ration Card nei lo te leh Mizoram-a raltlan awm mek te pawh inziahluh theih a ni ang.

Sawrkar hnathawk ve lo leh sawrkar-a Medical Reimbursement (MR) Bill ve thei lo ten sawrkar atanga MR an Bill ve theihna Mizoram State Health Care Scheme (MSHCS) Policy Year October 1, 2019-September 30, 2020 (thla 12)-ah khan inziaklut chhungkaw 61,015 awmin October ni 1, 2020 - September 30, 2021 (thla 12)-ah chhungkaw 1,13,720 an inziaklut leh a. October ni 1, 2021 - March ni 31, 2022 (thla 6) ah chhungkaw 87,695 inziaklut lehin kum kal mek 2022-23 atanga inziaklut zat chu chhungkaw 39,505 ah tlahniamin, kum hmasa aia a tlemna zaa 45.04 a tling a. Tunah hian April 1, 2023 atanga hman tan turin inziahluhna hun chu hawn leh mek a ni.

MSHCS-a inziahluhna man hi a inang lo a, Ration Card eng (AAY) nei te chu Rs. 200/- in an inziaklut thei dawn a, Ration Card hring (PHH) chhungkua te tan Rs. 1000/- a inziahluh theih niin Non-NFSA Card (Ration Card var) nei tan Rs. 2000/- leh Ration Card nei lo leh Raltlan awm mek te tan Rs. 2000/- bawkin inziahluh theih a ni ang.

MSHCS hnuaia inziaklutte hian damdawi In-a an inenkawlna senso chhungkaw khatin kum khat atan Rs. 2,00,000/- thleng an bill thei dawn a, Sawrkar hnathawk leh sawrkar hnathawk in a chenpui, sawrkar-a a bill sak theihte inziahluh phal ni lovin Sawrkara MR bill theilo zawng zawngte chuan Health Care hamthatna an hmang tangkai thei dawn a ni.

Hetihlai hian Mizoram sawrkar chuan changtlung zawka Health Care kalpuina turin Asian Development Bank (ADB) atangin cheng vbc. 1008 a puk dawn a, nikum June thla khan loan pukna tur chu Ministry of Finance in a pawmpui tawh a. ADB loan puk tur chungchang hi MNF Party chuan sawifiahna thuchhuah siam tawhin, chuta an tarlan dan chuan, loan puk tur cheng vbc. 803.76 chu External Aided Project (EAP) hnuaia kaltur a ni a, EAP Guidelines angin Central sawrkarin 90%, cheng vbc. 723.38 atangin a rul dawn a, loan puktu Mizoram sawrkarin 10%, cheng vbc. 80.38 atangin a rul thung ang.