RD Minister in Aibawk Mini-Sports Complex hawng

Cheng nuai 400 senga sak Aibawk Mini-Sports Complex chu nimin khan Rural Development Minister Lalruatkima chuan a hawng.

Mini-Sports Complex hawnna hunah hian RD Minister chuan Aibawk leh a chhehvel khua ten khelmual tha leh infiamna hmun tha tak an nei ta chu a lawmpui thu sawiin, Aibawk leh a chhehvel khua te tih hmasawnna tura Rural Development in tan a lak nasat zia a sawi a. Aibawk RD Block chu India ram-a RURBAN Cluster zingah RURBAN Project zo fel hmasa ber leh thawk tha ber a ni tih sawiin, “Project hnuaia item chi hrang hrang 48 a hun taka zawhfel a ni hian hmasawnna pawh nasa takin a thlen a, sawrkar laipui atanga endiktu rawn kalte pawhin lawmawm an ti,” a ti bawk.

Aibawk Mini-Sports Complex hi DoNER Ministry hnuaia NLCPR kaltlanga khelmual Project 4 zinga pakhat niin, he Project atana a tira sum ruahman cheng nuai 413-ah nuai 13 chu DoNER Ministry in lo cut-in May ni 5, 2017 khan cheng nuai 400 sanction a ni a. October ni 26, 2017-ah Tender tihchhuah niin February ni 5, 2018-ah NECS hnenah hna pek a ni a. He hna hi work order pek atanga kum 2 chhunga sak zawh tur a nih laiin COVID-19 hripui leng vangin vawi thum lai hun pawhsei sawrkarah dil a nih hnuin March ni 31, 2022-ah a hna lian zofelin tihchangtlunna tur atan contractor hian hna an thawk zui zel a. Mini-Sports Complex-ah hian Contact Sports Centre lian tha tak sak a nih bakah Aibawk Playground awm sa chu Standard size tlinga laih zau a ni a, Gallery leh Pavillion sak a ni bawk.