Education Policy kan neih tawh zinga belhchian dawl NEP 2020 a nih thu Larsap in sawi

Governor Hari Babu Kambhampati chuan, “National Education Policy 2020 chu Education Policy kan neih tawh zinga belhchian dawl ber, a ram mipuite mamawh leh mil-a duan a ni,” a ti.

Mizoram University-a Education Department in ni 3 chhung awh tur ‘National Seminar on NEP-2020 Philosophy : Indian Philosophical Thoughts and Contribution of Thinkers to the field of Education’ hawnna nimin a MZU Conference Hall-a neih a hmanpuina ah he thu hi sawiin Governor chuan NEP 2020 hian zirlai te chu khawtlanga an chhungkaw dinhmun emaw sum leh pai thu-a an chhungkaw dinhmun a thliarhranna awm miah lovin, Zirna tha zawk, intluktlanna leh remchanna angkhat a chhawpchhuah sak dawn tih a sawi a. “He policy hian Multidisciplinary Education, Research leh Innovation lam te a dah pawimawh bik dawn bawk a. Hemi avang hian India in nakin lawkah khawvel thluak bur (Global Knowledge Super Power) nih a tumna pawh a hlen theih a beiseiawm hle,” a ti a ni.

Governor chuan NEP 2020 hi document satliah a ni lo tih pawh sawiin, “He Policy hian tihhlawntlin tur kawng hrang hrangah huntiam neiin a chhawp teuh a. Hei vang hian NEP 2020 kalpui hi thil awlsam a ni lo tih a hriat a, Zirtirtute inpekna, taihmakna, thahnem ngaihna leh remhriatna ah te NEP 2020 tihhlawhtlina chu a innghat nasa lehzual a ni,” a ti bawk.

He National Seminar hi Indian Council of Social Science Research (ICSSR) in Azadi Ka Amrit Mahotsav hmalakna kal zel hnuaia an rawn chhawpchhuah niin Education Department, Mizoram University ten an huaihawt thung a ni.

Comments

Popular News (Last 30 Days)

LPG man bithliah thar