Chief Minister in Champhai District a tlawh

Chief Minister Zoramthanga chuan ni 2 cham turin Inrinni khan Champhai a thleng a, sawrkar kumthar, 2023-2024-ah sawrkar flagship programme kal mek SEDP hnuaiah chhungkaw 60,000 dang huam thartir leh tur a nih thu a sawi.     Chief Minister hian Champhai a panna kawngah NHIDCL in National Highway-6 siam hna an thawh mek chu enfiah nghalin Kawng awmsa laizaua siamthat te bakah kawng thar, Dulte Junction atanga Tuichang pawhtute, Khawzawl atanga Champhai panna kawng thar te chu a zawh a. NH-6 Dulte leh Champhai inkar Package-I siamtu Contractor, Dhariwal Buildtech Limited (DBL) leh NHIDCL aiawhte chu an hmalakna a sawipui bawk a ni.

    Chief Minister hi Champhai-ah MLA thenkhat leh District thuneitu ten an lo dawngsawng a, Champhai Circuit House-ah amah kâwmtu an party hruaitute hmaah Chief Minister chuan a bul tanna atana chhungkaw 60,000 SEDP sum lo dawntir tawhte chu 2nd installment pek chhunzawm an nih dawn bakah chhungkaw 60,000 dangte SEDP sum dawn thar tir an ni ang tih sawiin, sawrkarin sum a neih ang angte SEDP tihhlawhtlinna turin a pe chhuak dawn a ni, a ti. Chief Minister chuan Special Assistance to States for Capital Investment (SASCI) sum dawnte chu MLA bial tinah cheng vbc. 7 theuha sem sawm a ni a, hnathawh tur ruahmanna lian tham deuh, mipui tana tangkai thei tur ber thawh tur uluk zawka ngaihtuah a tul thu sawiin, sawrkar kumthar, 2023-2024 atan SASCI sum dang a lo kal leh thuai dawn a, hmasawnna hnathawh tur lo ruahman lawk a, ngaihtuahna zau zawk pu turin a chah bawk.