Dan lova sumdawnna dapchhuah ah thawhho tum

Mizoram chhunga hnamdang dan lova sumdawnna kalpuite dapchhuah kawngah MZP, Muslim Welfare Society Mizoram leh Central Mizoram Gorkha Youth Association (CMGYA) hruaitute chuan thawhho nise an ti.

Nimin khan Aizawl-a MZP Pisa Pui-ah MZP, Muslim Welfare Society Mizoram leh Central Mizoram Gorkha Youth Association (CMGYA) hruaitute hian Joint Meeting neiin Mizoram chhunga hnamdang dan lova sumdawnna kalpuite MZP-in dapchhuah a tum mek chu Muslim Welfare Society Mizoram leh Central Mizoram Gorkha Youth Association (CMGYA) hruaitute chuan tha an tih thu sawiin, a tul angin MZP hmalakna chu tawiawma thlawp nise an ti a. MZP chuan Mizorama hnamdang dan lova sumdawnna kalpuite chu an sumdawnna tihtawp a nih theih nan hmalak zel a tum a ni.

MZP in thuchhuah siama an tarlan danin tunhnaiah hnamdang dan lova sumdawnna kalpui hi a tamin, a hluar hle tih hriat a ni a. Mizo hming hawha sumdawnna bakah, State pawn atangin man tlawmte te in phalna neilo ten Mizoram chhungah sumdawnna an kalpui nasa hle a, an bungrua an hralh zawh hunah an haw leh mai zel tih pawh hriat a ni. Hei hi tualchhunga Mizo sumdawngten an tuar hle a, nghawng lian zawk a neih hmaa tihtawp a nih theih MZP chuan hmalak a tum a ni. He hmalakna ah hian MZP chuan a tul angin pawl dang pawh Meeting pui zel a tum a, kan ram leh hnam tana hmalakna a nih avangin Mizo mipuite thlawpna a ngen nghal bawk tih an sawi.

Comments

Popular News (Last 30 Days)

Vawiin-ah HSSLC Exam result

LPG man bithliah thar