Kawppui thlan-ah Hnam anga thanharh tul ti

Art & Culture Minister R. Lalzirliana chuan hnamdang kawppui a thlan chu hnam ralna pakhat a nih avangin kawppui thlan kawngah hnam anga thanharh a tul thu a sawi.

    Zirtawpni kalta zan-a Mizo film thar ‘Black Rose’ tlangzarhna hun Aizawl-a Vanapa Hall-a neih ah he thu hi sawiin Art & Culture Minister chuan, hnam-a chian a pawimawh hle a, nupui pasal zawn kawngah pawh fimkhur zual a tul, a ti a. Mizoram mai ni lovin khawvel ah ‘movie’ en nasat a nih thu pawh sawiin, zirtirna tha nei tam tak a awm laiin thenkhat erawh chu nun tichhe thei an nih avangin fimkhur zawka movie en turte thlan thiam a ngai, a ti a. Khawchhak leh khawthlang lam film-ten nasa takin Mizote a run mek nia a hriat thu pawh sawiin, Mizo kutchhuak ngei te uar zawk a en a tul a, hah tak leh sum leh pai tam tak senga siam a nih avangin an thawhrimna chawisan sak theihna pawimawh tak a ni, a ti bawk. Mizo film tam takah Mizote nun dan phung leh ziarang tarlanna a tam tawk lo tih pawh Minister chuan sawiin, Zo ze mawi leh ziarang tarlang thei film tam zawk siam turin Mizo film buatsaih thin te chu a ngen bawk.